Naalagaaffiit Peqatigiit silap pissusia pillugu isumaqatigiinniarnitik sivitsortariaqaraat

Naalagaaffiit Peqatigiit (FN) COP28-mik taallugu silap pissusia pillugu Dubaimi ataatsimeersuarnerisa Dubaimi kingusinnerpaamik ullaap tungaani nalunaaqutaq aqqanermut naammassineqarnissaa, COP28-p siulittaasuata Sultan al Jaberip arlaleriarluni erseqqissaatigisimavaa. Tassa nunatta nalunaaqutaa naapertorlugu ullaassaq nalunaaqutaq tallimanngortoq.

Naallu ataatsimeersuarnermi inaarutaasumik arlalinnit isornartorsiorneqartumik isumaqatigiissutissatut siunnersuummik ataasinngornermi saqqummiussaqaraluartoq, Dubaimi aqqaninngorsimatsiaannartoq ataatsimiinneq suli naammassineqarsimanngilaq.

Ikummatissanik atuinerup siunissami annikillisarneqarnissaa ukioq manna ataatsimeersuarnermi pingaarnerpaatut eqqartorneqarpoq.

Aamarsuit, uuliap gassillu siunissami atorunnaavinnissaasa isumaqatigiissutissatut siunnersuummi ilaatinneqarnissaat nunat amerlasuut pingaarnertut piumasaraat.

Assersuutigalugu Saudi-Arabiap tamanna arlaleriarluni akuersaarumanngereerpaa, tamannalu COP28-mi siulittaasut siunnersuusiorneranni aamma ilaatinneqanngilaq.

- Isumaqatigiissutissatut siunnersuut naammaqqajanngilaq, Danmarkip nunani tamalaani silap pissusia pillugu politikkimut ministeria Dan Jørgensen(S) ataasinngornermi oqarpoq.

- Ikummatissat pillugu angusaqarluarniartoqarnerusariaqarpoq, Dan Jørgensen oqarpoq.

Ataatsimeersuarnermi inaarutaasumik isumaqatigiissut nunat ataatsimeersuarnermi peqataasut 200-ngajaat tamarmiullutik isumaqatigiissutigisussaavaat.

Qaqugu tamanna pissanersoq ilisimaneqanngilaq, inaarutaasumillu isumaqatigiissutissatut siunnersuutip nutaap marlunngornermi saqqummiunneqarnissaa ilimagineqarpoq.