Danskit ministeriat: Silap pissusia pillugu ataatsimeersuarnissaq Parisimi ataatsimeersuartoqarmalli aatsaat taama pingaaruteqartigaaq
Ministerit sinniisullu nunanit 40-nit amerlanerusuneersut silap pissusia pillugu Københavnimi ippassaq ataasinngornermi ullumilu marlunngornermi ataatsimeersuarput.
Københavnimi ataatsimeersuarneq, silap pissusia pillugu De Forenede Arabiske Emiraterini novembarimi decembarimilu ataatsimeersuartoqarnissaanut piareersaataavoq.
Naalagaaffiit Peqatigiit silap pissusia pillugu ataatsimiittartoqatigiivisa nalunaarusiaat nutaaq nikallunganartoq saqqummiunneqaqqammersorlu Københavnimi ataatsimiittoqarpoq, De Forenede Arabiske Emiraterinilu ataatsimeersuarnissaq, Parisimi 2015-imi COP21-mik taallugu ataatsimeersuartoqarmalli aatsaat taama pingaaruteqartigisoq, silap pissusia pillugu politikkimut tunngasuni Danmarkip ministeriata Dan Jørgensenip oqaatigaa.
Silap kiatsikkiartornera annerpaamik 2 gradinut, sapinngisamillu 1,5 gradinut, killilersimaarnissaa pillugu inatsisitigut pisussaaffiliisumik COP21-mi isumaqatigiissusiortoqarpoq.
Nunani tamalaani politikerit novembarimi decembarimilu ataatsimeersuartoqarnissaa sioqqullugu Naalagaaffiit Peqatigiit silap pissusia pillugu ataatsimiittoartoqatigiivinit ippassaq ataasinngornermi kimigiiserfigineqarput.
Nunarsuarmik najussaasumik piujuaannartitsinerlu aallaavigalugu inuuneqarnissamut qulakkeerinninnissamut suli piffissaqarpoq. Periarfissalli sukkasuumik ikiliartorput. Ima paasillugu: Gassinik silaannarmik kissakkiartortitsisartunik aniatitsineq annikillisarneqalertortariaqartoq, Naalagaaffiit Peqatigiit silap pissusia pillugu ataatsimiittartoqatigiivi oqarput.
Silap pissusiata allanngoriartornerata akiorniarneqarnissaa pillugu Parisimi isumaqatigiissusiami anguniarneqartut sulissutigineqarnerisa killiffiat, De Forenede Arabiske Emiraterini ukiup massuma naalernerani ataatsimeersuarnermi nalilersorneqassapput. Parisimi isumaqatigiissusiortoqarnerata kingorna siullerpaamik taamaaliortoqassaaq.
