Trump Zelenskyj-lu Trump Towerimi ullumi naapissasut

Ukrainep præsidentia Volodymyr Zelenskyj USA-milu republikanerit præsidentitut sassartitaat Donald Trump New Yorkimi tallimanngornermi naapissapput.

Trump sisamanngornermi unnukkut taama oqartoq, nutaarsiassaqartitsivik Reuters allappoq.

- Præsident Zelenskyj-lu Trump Towerimi aqagu ullaakkut qulinngulernerani ataatsimiissaagut, præsidentiusimasoq Donald trump oqarpoq.

Tassa nunatta nalunaaqutaa naapertorlugu ataasinngulernerani naapissapput.

- Aseruatiterinerit, toqoraanerit amerlasoorujussuupput. Ukrainemi pisut kanngunaannarput. Amiilaarnaqaat, republikaneri oqarpoq.

Ukrainep præsidentia FN-p ataatsimeersuarneranut atatillugu sapaatip akunnera matumani USA-miippoq.

- Zelenskyj- naapinnissaanut qilanaarpunga, Trump oqarpoq.

Zelenskyj-lli Ukrainemi sorsunneq pillugu piffissami kingullermi oqaaseqaatai iluarivallaarnagit, Trumpip aamma ersqqissaatigaa.

Ukrainemi sorsunnerup qanoq unitsinnissaa Trumpip nalugaa, Zelenskyj aviisimut The New Yorkerimut oqarsimasoq nutaarsiassaqartitsivik Reuters allappoq.

Præsidentiugaluaruni Ukrainemi sorsunneq unitsilertorsinnaassagaluarini, Ruslandip Ukrainemik 2022-mi saassussilerneranili Trumpip ataasiaannarani oqaatiginikuuaa.

Ataatsimiinneranni suut eqqartorneqassanersut erseqqissumik suli oqaatigineqanngilaq.