Nunarsuup imaa ukiut 80-it qaangiuppata centimeterinik qulinik qaffassinnaasoq
Sermersuarput ima aakkiartupiloortigimmat nunarsuup imaata ukiut 80-it qaangiuppata centimeterit qulit 12,5-illu akornanni qaffanneranik kinguneqarsinnaavoq.
Ilisimatuut nunanit tamalaaneersuut nunatta sermersuata aakkiartorneranik ukiuni 30-ni ilisimatusarnermi paasisat tunngavigalugit misissuinerminni taama siulittuuteqarput.
Nunarsuup imaa qaffassagaluarpat ilaatigut nunarsuarmi pukkitsunik sineriallit eqqugaajumaarput. Silap pissusianik ilisimatooq DMI-meersoq allaatiginneqataasorlu John Cappelen taama naliliivoq.
AAMMA ATUARUK Sermersuup aakkiartornera 90-kkunni aakkiartorneranit arfineq-marloriaammik sukkanerusoq
Nunarsuup kiatsikkiartortuarsinnarnera siulittuutiminnut tunngavilersuutigivaat.
Nunatsinni sineriannut qanittut kiatsikkiartupiloortut misissuinermi nutaami erserpoq. Nunarsuaq 1991-ip 2019-illu akornanni aasakkut agguaqatigiisillugu 1,7 gradinik ukiakkullu agguaqatigiisillugu 4,4 gradinik kiatsikkiartorsimavoq.
Maannatulli kiatsikkiartortuarsinnassappat 4 gradit 6,6 gradillu akornannik kiatseqqeriaannarumaartoq siulittuutigineqarpoq.
Ingammik nunat issittut silap pissusiata allanngoriartorneranit eqqugaanissaminnut qaninnerusut nunatta eqqaata kiatsikkiartupiloornerani ersertoq, John Cappelen erseqqissaavoq.
- Nunarsuup kiatsikkiartornera killilersimaarniarutsigu ileqqutsinnik allannguisariaqarpugut, John Cappelen oqarpoq.
- Nunarsuup kiatsikkiartuaarsinnarnera Parisimi isumaqatigiissummi anguniakkat tunngavigalugit killilersimaarutsigu, Kalaallit Nunaata kiatsikkiartuaarnera aamma killilersimaarneqassaaq.
AAMMA ATUARUK Sikuiuitsoq Kujalleq aatsaat taama kiatsigisoq
Nunarsuup kiatsikkiartornerata annerpaamik 2 gradinut - sapinngisamillu 1,5 gradimut - killilersimaarnissaa nunat 196-it Naalagaaffiit Peqatigiinni ilaasortat Parisimi 2015-imi isumaqatigiissutaanni anguniagaavoq.
