Sikuiuitsoq Kujalleq aatsaat taama kiatsigisoq

Sikuiuitsoq Kujallermi aatsaat taama kiatsigivoq.

Argentiamiut nunavissuit kujallersaanni misissuisarfianni kiassuseq 18,3 gradiusoq ippassaq uuttorneqarpoq.

Nunani tamalaani silasiortut kattuffiata (WMO) uuttorneqartoq sumiiffimmi tassani uuttorneqartarsimasunit asseqanngitsoq tallimanngornermi uppernarsarpaa.

- Uuttuineq Sikuiuitsoq Kujallermut atassuserneqarnissaa nalinginnaasumik pisartuunngilaq. Aamma aasaagaluaraangat, WHO-mi oqaaseqartartoq, Vlare Nullis oqarpoq.

Nunavissuit kujallersaanni 2015-imi kiannerpaasumik uuttuisoqarpoq, tassani kiassuseq 17,5 gradiuvoq.

- Sikuiuitsoq Kujallermi qeqertaasaq nunarsuarmi nunap immikkoortuani kiatsikkiartornerpaat ilagaat, Nullis oqarpoq.

Ilisimatuut oqarnerat naapertorlugu Qalasersuaq Kujallermi sermeq aangaarami sermit iigartarfiisa avissaartuunnissaat aarlerinarpoq, Reuters allappoq. Taamalu pisoqassappat nunarsuup imartaa minnerpaamik 3 meterimik ukiuni hunnorujullikkaani tulliuttunut qaffassaaq.

- Sikuiuitsoq Kujallermi sermip aakkiliartornera 1979-imit 2017-imut minnerpaamik arfinileriaammik sikuerukkiartornerulerpoq, Nullis oqarpoq.

Sikuiuitsup kujalliup eqqaani qeqertami 19,8 graderimik kiattoq siusinnerusukkut uuttorneqarnikuuvoq, Sikuiuitsoq Kujallermilu nunavissuarmi aatsaat taama kiatsigaluni 18,3 gradimik kiappoq.

Silap pissusia pillugu kingullermik Spaniap illoqarfiisa pingaarnersaanni Madridimi ataatsimiittoqarpoq.

Ataatsimeersuarneq pilersaarummit ullunik marlunnik sivisuneruvoq, ataatsimiinnermilu isumaqatigiissutigineqartoq arlalitsigut pakatsinartuutinneqarpoq, Parisimilu isumaqatigiissummi anguniakkamit tassa nunarsuup kiatsikkiartornerata 1,5 gradimut killilersimaarnissaanik anguniagaqarnermit allaanerungaatsiarluni.