Meeqqat illersuisuat: Piniartut aalisartullu meeraat silap pissusiata allanngoriartorneranit annikilliorput

Nunatta avannaarsuani Qaanaami, Siorapalummik Savissivimmilu aalisartut piniartullu immap sikuunnginnera piniarnissamullu periarfissaqannginnera nalaappaat.

Piniartut aallaaniarnissamut periarfissaqannginnertik pissutigalugu isertitassatik annaavaat, tamannalu 'ajornartoorfiuvoq', MIO aamma Meeqqat illersuisuat, Aviâja Egede Lynge, tusagassiuutinut nalunaarummi allappoq.

- Ilaqutariit annertuumik annikilliorput, ilaqutariillu killissartik qaangerujussuaqqavaat, tassami meeqqatilluunniit nerisassaqartinngilaat. Silaannaap ingasattajaartumik allanngoriartornerata inuiaqatigiinnut tamanut akornutaalerpoq, taamaalineranilu piniartut ilaqutariit immikkut ittumik eqqugaapput, tassami meerartai taamaalillutik ajornerpaamik eqqugaapput, Aviâja Egede Lynge tusagassiuutinut nalunaarummi allappoq.

Taamaammat taassuma Naalakkersuisunut qinikkat ilaqutariinnut silap pissusiata allanngoriartora pissutigalugu isertitaminnik annaasaqartunut ikiuinissaannik kaammattuuteqarfigai.

- Naalakkersuisut kommunillu sakkortunerpaamik kajumissaarpakka ilaqutariit isumageqqullugit, pineqartullu peqatigalugit ajornartorsiutit aaqqeqqullugit, meeqqammi kaallutik innartussaanngillat.

- Meeqqat tamarmik, angajoqqaavi piniartuuppata piniartuunngippataluunniit, pisinnaatitaaffigivaat ajunngitsumik toqqissisimanartumillu meeraassallutik, annikillioratik, taanna oqarpoq.

Tunumi aamma tamanna ajornartorsiutaasoq

Immap sikuata qerinnginnera nunatta avannarpasissortaanit kisimi ajornartorsiutigineqanngilaq. Tunumi immap sikuunnginnera Ittoqqortoormiini aamma kingunerluutigineqarpoq.

Piniartup, Scoreby Hammekenip KNR-imut oktobarimi tamanna oqaluttuaraa.

- Qangatut pisuuppat massakkut sikoreersimassagaluarpugut. Kisianni imaannavissuuvoq, sissap sinaa suli qerineqanngilaq. Aputeqaraluarpugut kisianni suli sikunngilaq, taanna KNR-imut oktobarimi oqarpoq.

Tamannalu piniartut puisinniarnissamut periarfissaannut sunniuteqangaatsiartoq, Scoresby Hammeken nassuiaavoq.

- Siornatigut sikunialeraangat aallarfissaqarluta puiserpassuit pisarisinnaasarpagut. Oktobarimi sikoreerataraluarpugut kisanni maanna aatsaat novembarimi decembarimi ilaannilu aatsaat januarimi siku atorsaalertarpoq. 

Qinikkat iliuuseqassasut

Pinngortitaminit inuussutissarsiortut qinikkanit iliuuseqartoqarnissaa ujartorpaat, piniartut, aalisartut savaatillillu tamaalillutik aningaasarsiornissamut periarfissaat siunissani silap pissusiata allanngoriartorneranit sunnerneqarpata aningaasaqarnikkut ikiorneqarsinnaassammata.

Aalisarnermik piniarnermillu inuussutissarsiuteqartut ajunaarnersuaqassagaluarpat assersuutigalugu pilersitseqqissinnaanissamut taperserneqarsinnaalerniassammata naalakkersuisunut allanngueqqussuteqarnermik siunnersuut Inatsisartuni amerlanerussuteqartut oktobarimi akuersissutigaat

Meeqqat illersuisuat Naalakkersuisunut assingusumik maanna kaammattuuteqarpoq. Tassa qinikkat 'ilaqutariinnik silap pissusiata allanngoriartornerata kingunerisaanik annikilliortunik isumaginnissasut'.