Teknikkikkut ajutumeernerit, silarluk sikorsuillu Kujataani Avannaanilu angallanniarnermi ajornartoortitsisut

- Avannaani innuttaasut angalaniarnikkut ajorluinnartumik sullinneqarnertik misigisaqarfigaat.

Avannaata Kommuniata borgmesteria, Palle Jeremiassen (attaviitsoq), tusagassiorfinnut ataasinngornermi nalunaarummini taama allappoq.

Qulimiguullip Uummannap eqqaani angallassissutaasartup teknikkikkut ajutumeernera pissutaalluni tamatuma eqqaani silaannakkut angallassineq sivitsoruttoortumi kinguaattoorfiusaqattaarnera naammaginanngitsoq, taanna isumaqarpoq.

Tassa Uummannap eqqaani silaannakkut angallaniarneq sualummik februaarimili kipiluttunarluinnarpoq. Qulimiguulimmillu peqquteqavillutik nakorsiarlutillu angalaniartorpassuit pissutsit taamaanneranni eqqornerlunneqaqattaarput.

- Allaammi sapaatip akunneranik kinguaattoornerit pisarput, taanna allappoq.

Kujataani umiatsiamik angallanniarneq aamma kipiluttunarpoq. Kujataanimi angalaniat sikorsuaqarnera pissutigalugu ullut arlaqartut kinguaattoortarput.

- Apuukkusuttunut ilungersunartorujussuuvoq, Kommune Kujallerup borgmesteria Stine Egede (IA) KNR-imut oqarpoq.

Air Greenland ajuusaartoq

Angallanniarnerit kipiluttunarunnaaqqullugit aaqqiissuteqartoqartariaqartoq, borgmesterit taakkua marluk isumaqarput.

Uummannap eqqaani angallanniarnerup kipiluttunarnera akuersaarneqarsinnaanngimmat Namminersorlutik Oqartussat Air Greenlandilu suleqatigiillutik qanoq iliuuseqartariaqartut, Palle Jeremiassen isumaqarpoq.

- Paasisinnaasarparput silarluk pissutigalugu angalaniarneq eqqorneqaraagat, kisiannili matumani teknikkikkut ajutumeeqattaarnerit amerlavallaaqaat, inuppassuillu eqqornerlunneqartarput, ukiuutillugu silaannakkut angallassineq pisariaqartittarmassuk, taanna allappoq.

- Namminersorlutik Oqartussat aamma Air Greenlandip kiffartuussinissamik isumaqatigiissuteqarput, innuttaasut kiffartuunneqarnissaat pillugu, tunulliunneqarnissaat pinnagu.

Air Greenlandip kinguaattooqattaarnerit ajuusaarutigai.

Kinguaattooqattaarnerit Air Greenlandip qulimiguuliata H155-imik taaneqartartoq teknikkikkut ajutumeeqattaaneranik pissuteqartut, Air Greenlandimi  piujuartitsinermut attaveqaqatigiinnermullu pisortaq Inga Dora Markussen oqarpoq.

- Ilumoorpoq qulimiguulik taanna februaarip 22-ani teknikkikkut ajutumeerluni uninngasimagami ullut arlallit, kingoraartissaq utaqqinikuullugu tikimmat aallarteqqinnikuugami, taanna KNR-imut oqarpoq.

Qulimiguulik taanna aaqqimmat ullualuit qaangiuttut teknikkikkut ajutumeeqqimmat tassunga kingoraartissaq, silarlunnera aamma pissutaalluni, apuunneq ajulerpoq.

- Tamanna soorunami ajuusaarnarpoq, Inga Dóra Guðmundsdóttir Markussen oqarpoq.

Tupaallaatiginngikkaa

Kujataani umiatsiamik angallanniarnerup sikorsuaqarnera pissutigalugu kipiluttunarnera Kommune Kujallerup borgmesteriata, Stine Egedep, tupaallaatiginngilaa.

Diskoline ilaasartaataanik Qaqortumiit Nanortalimmut, Narsamut, Narsarsuarmut nunaqarfinnullu marsip sisamaanili angallassisoqarunnaarallarpoq.

- Piffissaq sivisungaatsiartoq ingerlasareerpoq sikorsuarnit taamatut angalasinnaaneq killilerneqarmalli. Tamanna ukiut tamaasa pisarpoq, Stine Egede KNR-imut oqarpoq.

- Aamma ukiut tamaasa tupattutut ililluta, soorlu aatsaat taamaattumik misigisaqalersutut ittarnerput, isumaqarpunga tassunga killeqartariaqalersoq.

Angallassinermi qulimiguullit sikorsuaqarnera pissutigalugu kisimik isumalluutaalermata ilaatigut ulluni arlalinni kinguaattooqattaartoqarpoq.

- Nakorsiarniarsarisut nakorsiareerlutilluunniit angerlarniarsarisut ilaat ullut qulit sinnerujussuarlugit utaqqisut tusartareerpagut, aamma nunaqarfimmiut maani eqqatsinni eqqarsaatigalugit, Stine Egede oqarpoq.

Sikunik alapernaarsuisartut nunap isuata eqqaani marsip qulingiluaani alapernaarsuigamik nalunaarutaat naapertorlugu sikorsuit takkuttussat suli isorartupput.

- Malinnaatinneqartuaratta, uiartussat suli annertunerujussuupput. Aatsaallu aasaru sarfaq allanngorpat aatsaat avammut saakkumaarput, Stine Egede oqarpoq.

Taamaammat angallanneq qaammatini tulliuttuni arlariinni qularnaatsooqqullugu aaqqiivigineqartariaqartoq, taanna isumaqarpoq.

Naalakkersuisut nunatsinni angalatitsiviit suleqatigalugit tamanna aaqqiissutissarsiorfigisariaqaraat, Kommune Kujallerup borgmesteria naalakkersuiunut ammasunik allakkamini piumasaraa.

Naalakkersuisut qanoq iliuuseqarnissamik akissiineqartut

Qulimiguulik Uummannami eqqaanilu angalatatitaq ataasinngormalli marsip aqqarnanili angalaqqilertoq, Inga Dóra Guðmundsdóttir Markussen KNR-imut oqaluttuarpoq.

- Uummannap eqqaani angallassinerup aalaakkaasuunissaanik sapinngisamik qanoq iliuuseqarpugut.

Air Greenland assingusumik pisoqaqqeqqunagu aaqqiissuteqarniarsarileruttorpoq. Qulimiguulik H155 allamik taarserneqassanersoq, aamma misissorpaat.

Uummannap eqqaani Kujataanilu angalaniat kinguaattoortarnerat Naalakkersuisut qanoq iliuuseqarfiginiarneraat pillugu akissuteqartitsiniarnerput suli iluatsinngilarput.