Naalakkersuisoq: Ineqarnermut akiliut qaffassaaq

Inissiat aserfallassimaqisut iluarsartuunneqarnissaannut pilersaarut Ineqarnermut Attaveqaasersuutinullu Naalakkersuisup Hans Peter Poulsenip (S) pingasunngormat saqqummiuppaa.

Inissiarsuarnik ukiuni 20-ni tulliuttuni iluarsartuussinissaq 2,5 milliardit koruuninik akeqassaaq, taamalu suliniuteqarneq 2044-mi naammassissaaq.

Aningaasarpassuit pineqarmata tamarmillu nammineq akilerneqarsinnaanngimmata ineqartut akileeqataassapput. Ineqarnermullu akiliutit 2027-miit qaffanneqassasut, naalakkersuisoq oqarpoq.

- Ineqartut akiliutigisartagaasa aamma qaffakkiartornissaat avaqqussinnaanngisarput qaqugukkulluunniit, taanna aningaasartaannut ilaavoq, Hans Peter Poulsen oqarpoq.

Akiligassaq kinguaariinnut tulliuttunut ingerlateqqikkumanagu ineqarnermut akiliut ukiut pingasut qaangiuppata qaffanneqassasoq ineqarnermut naalakkersuisoq, Hans Peter Poulsen (S), oqarpoq. Assi © : Kommune Qeqertalik

Inissiarsuit iluarsartuunneqarnissaat nunatta karsianut 1 millardit koruuninik akeqassaaq, ineqartut akililiutigisartagaasa 2027-miit ukiuni 15-ini ukiumut 3,8 procentinik qaffanneqartarnerisigut ineqartut 1,2 milliardit koruuninik akileeqataanissaat pilersaarutaavoq.

Taamaaliortoqanngippat iluarsartuussinerlu aallartinneqanngippat kinguaariinnut tulliuttunut akisoorujussanngornissaa pinaveersaartinniarlugu naalakkersuisut taama aalajangiisut, ineqarnermut naalakkersuisoq oqarpoq:

- Kingusinnerusukkut akilerneqassappat kinguaariit tulliisa akiligassarilissagamikku, taanna pinaveersaarniarlugu massakkuuvoq akiligassartaasa nalimmassarnissaat.

Ineqarnermut tapi nalimmassarneqassasoq

Ineqartulli ilaasa qaammammut akiliutigisartagaasa ineqartunut artukkiivallaannginnissaat qulakkeerniarlugu ineqarnermut tapi tassa boligsikringi aaqqissuussiffigeqqinneqassaaq.

- Inatsisitigut allannguiffigissavarput pitsanngorsarlugu, taamaalilluni eqqornerlunneqarsinnaasut aappaaguagu eqqornerlunnerat annikillisinniarlugu, Hans Peter Poulsen oqarpoq.  

Inissianik ukiup tullianiit iluarsartuussisoqalerpat inissiat silataat siulliunneqassapput, inissiallu ilui ukiullu qulit missaat qaangiuppata tullinnguutissasut pilersaarutaavoq.

- Igalaat, qaliat, taavalu aamma uffarfiit imermit pitsaanngitsumik kalluarneqaqqasut, tassa taakkuupput siullermik suliniummi ingerlatassagut. Taava taamaalereerpat ukiut qulit missaat qaangiuppata immikkoortut aappaanni illut iluaniittut iluarsaanneqarnissaat tullinnguutissaaq.

Ukiuni 20-ni tulliuttuni inissianik iluarsartuusinissamik suliniut naalakkersuisut ima taaguuteqartippaat "Inissiat peqqinnartut ataatsimoorfigalugit".