Inissiat iluarsartuunnissaannut akiligassaq 2,3 milliardit koruuninngortoq

Namminersorlutik Oqartussat nuna tamakkerlugu inissiaataat attartortakkat, 6000-it missaanniittut amerlanerpaartaat aserfallassimaqaat. Iluarsartuunnissaannullu aningaasat kinguaattoorutit milliardit marluk sinnersimalerpaat.

- 2,2 2,3 milliardit missaannik massakkut killiffeqarlutik. Taannalu ullormiit ullormut qaffakkiartorpoq, ineqarnermut naalakkersuisoq, Erik Jensen KNR-mut oqarpoq.

Akiligassaq taanna ullormut 500.000 koruuninik qaffattartoq, ineqarnemut naalakkersuisuujunnaaqqammersup, Naaja H. Nathanielsenip siorna oqaatigaa.

AAMMA ATUARUK Inissiat iluarsartuunnissaannut akiligassaq ullormut 500.000 koruuninik qaffattartoq

Inatsisartut aningaasanut ukioq mannamut inatsisaanni iluarsartuussinissamut 141 millionit koruunit immikkoortinneqarput.

- Taannalu naammanngilaq, ukua 2 milliardit sinnerlugit aningaasat pisariaqartinneqartut eqqarsaatigissagaanni, Erik Jensen oqarpoq.

Naalagaaffik akiliinissamut pisussaaffilerusukkaa

Taamaattumik akiligassap nungunniarnerani Namminersorlutik Oqartussat kisimik akiliissangitsut naalakkersuisup neriuutigaa.

- Naalagaaffik aamma tassani pisussaaffilerlugu kivitseqataassasoq, kommunit oqaloqatigalugit Namminersorlutik Oqartussat aamma tassunga aqqutissiuusseqataallutik inissisimasinnaappata isumaqarpunga ajornartorsiut annertoorujussuarmik kivitseqatigiinnikkut aaqqinneqarsinnaasoq, Erik Jensen oqarpoq.

AAMMA ATUARUK Pisortat inaataani najugaqartut iluarsartuussinissamut utaqqisariaqarput

Kissaatinilu tamanna pillugu tunuliaquttani Inatsisartunilu ilaasortat tusarniassallugit oqarpoq.

Naalakkersuisup oqarnera naapertorlugu inissiat iluarsartuunneqartariaqartut amerlanerit tassaapput 1960-kkunni 1970-sikkunilu inissialiat.

Ajunngitsut amerlanngitsut

Naalagaaffik inissianik sanaartornermut taamani akisussaasuvoq. Nunatta ineqarnermut oqartussaaffik danskit naalagaaffiannit aatsaat 1987-mi januaarip aallaqqaataani akissussaaffigilerpaa.

Namminersorlutik Oqartussat inissiaataanni 6000-it missaanniittuni, 217-nnaat ajunngitsutut suliarineqartariaqanngitsutullu 2016-mi nalunaarusiarineqarpoq. Taakkunannga sinneri nutartigassatut ingutsigassatulluunniit nalilerneqarput.

Iluarsartuussinissamut kinguaattoorutit 2016-mi 1,5 milliadit koruuniupput. 2019-milu 1,7 milliardit koruuniullutik.