Inissiat iluarsartuunnissaannut akiligassaq ullormut 500.000 koruuninik qaffattartoq
Pisortat inissiaataasa iluarsartuunneqarnissaannut kinguaattoorneq milliardinik marlunnik naleqanngujuulerpoq, akiligassarlu ullut tamarluinnaasa 500.000 koruuninik qaffattarpoq.
Ineqarnermut attaveqaasersuutinullu naalakkersuisoq, Naaja H. Nathanielsen (IA), Inatsisartut apeqqarissaarneranni ullumi oqarpoq.
Tassani Demokraatinit, Nivi Olsen, ineqarnermi pissutsit pillugit aperivoq.
- Akiligassarujussuup ineqartunut tunniutiinnannginnissaa uani qulakkiissavarput. Siornatigut ataasiarluta misigereerparput. Aaqqiissutissanik ataavartunik nassaassaagut, Naaja H. Nathanielsen oqarpoq nangipporlu:
AAMMA ATUARUK Inissianut akit pisortat iluarsartuussinissaannut naammanngitsut
- Iluarsartuussinissanut kinguaattoornernut akiligassaq milliardi ataasiinnanngilaq. Milliardit marlunngornissaannut qanilliartorpoq. Soorlu aamma apeqqarissaarnermi siornatigut oqartunga, akiligassaq ullormut 500.000 koruuninik qaffattartoq.
Affaat sinnerlugit attartortuusut
Naalakkersuisut pilersaarutertik tamakkiisoq, Naalakkersuisut siuliisa suliaralugu aallartissimasaat, maanna suliaraat. Inuillu amerlanerit namminneq pigisaminnik initaarnissaat, anguniakkanut ilaavoq.
- Namminneq ineqarnissaminnut akissallit nammineernissaat aaqqiissutissanut ilaavoq. Taava pisortat inissiaataat, namminneq ineqarnissamut akissaqanngitsut najugarissavaat, taanna oqarpoq.
AAMMA ATUARUK Nunatsinni inissiat affaasa missaat nutartertariaqarput
Inuiaqatigiit affaat sinnerlugit pisortat inissiaataanni maanna najugaqarput. Taamaattumik pisortat inissiaataasa iluarsartuunneqarnissaat pingaaruteqartoq, Naaja H. Nathanielsen isumaqarpoq.
- Inissiani taakkunani najugaqarnissaq aamma pilerinartuusariaqarpoq. Akilertakkamut tulluartuusariaqarput. Taamaattumik iluarsartuunneqarnissaat pisariaqarluinnarpoq, taanna oqarpoq
- Init aserfallannikut nalusatsinnillu akisuupilussuit tunniutiinnarsinnaanngilagut. Tamanna naleqqutinngilaq.
AAMMA ATUARUK Inissianut akit pisortat iluarsartuussinissaannut naammanngitsut
Naaja H. Nathanielsenip tamatuma saniatigut inuttaasut amerligaluttuinnartut nunatsinni illoqarfinni anginerusuni najugaqarnissaminnik kissaateqarnerat tikkuarpaa.
- Inissaaleqisoqalersarpoq, aamma sumiiffiit taakkua tassaapput nungullarsimasunik inissiaqarfiusut, taamaattumik suut tamaasa eqqarsaatigisariaqarput, taanna oqarpoq.
