Ilisimatooq Nunatsinni inissiat affaasa missaat nutartertariaqarput

Nunatsinni inissaqartitsiniarnikkut ajornartorsiutit iluarsinissaannut sulerujussuarnissaq pisariaqarpoq. Inuilli 1000-illit ajoqisunik najugaqartillugit Inatsisartunut inissiat nutaat 25-t sananeqassapput.
Allattoq Jens Betak, Anna P. Knudsen
apriilip 22-at 2019 14:16

Aserfallatsaaliuinerlunneq, oquk oqorsaatilunnerlu Nunatsinni inissiarpassuarni ajornartorsiutaammat iluarsaanissaq pisariaqaqaaq. Taava aamma Nuummi, Sisimiuni Qaanaamilu inissaaleqisoqaqaluni.

Issittumi sanaartornermik immikkut sammisaqartuusup, DTU-mi lektorip Tove Ladingip, nalunaarusiaa nikallornaqaaq.

Taassuma Nunatsinni inissiani maanna 23.000-iusuni, affaat arlaatigut iluarsagassaasut nutartigassaallutilluunniit nalilerpaa.

- Ilai aserfallalaaginnarnikuupput, ilaalli ajorluinnarput ingutsigassaallutik iluarsartuussassaallutilluunniit, Tove Lading oqarpoq.

Ajornartorsiutit

Inissiat iluarsaattarisaqartut amerlanersaanni pingasut tikkuagassaasut taanna oqarpoq.

Siullertut; Inissiat ilui nutaanngilisimapput. Igaffiit taarsigassaapput. Uffarfiit iluarsaanneqassanatik sumiginnagasimapput. Taava aamma kiak aniaannavippoq, iikkat kiffiusersornissaannut taamani malittarisassat ullumikkornit allaanerummata. Tassalu inissiat kiassarnissaat akisoqaaq.

Aappaattut; Oqoqartunik Inissiaqaqaaq. Inissiat qasserpiaat oqoqarnersut ilisimaneqanngilaq, nalunaarusiamili 2016-imeersumi allassimavoq: ”inissiat amerlasuut oqoqarput atorsinaanatillu”.

Taavalu; Inissiat betonitaat arlalitsigut nungujartulersimapput.

AAMMA ATUARUK Inatsisartunut inissialiorneq sipaarfiussaaq

Inatsisartut Nuummi najugaqartuungitsut ataatsimiigiartillutik najugarisartagassaannik sanaartornissaq KNR-imi marsimi allaasereqqaaratsiguli, attaveqaqatigiittarfimmi facebookkimi atuisut allaqattaarput. 

- Imminnut isumagisut. Innuttaasut isumaginngikkaat, facebookimik atuisoq, Ole Heilmann allappoq.

Ilisimatoorli eqqissisaavoq. 

Inatsisartunut inissialiornissami aningaasaliussat inissiaqarnikkut ajornartorsiutinik aaqqinniarnissami sunniuteqarpallaassanngitsut, taanna naliliivoq:

- Inissat 25-it amerlavallaanngillat, najugassaminnimmi pisariaqartitsipput, tassa ungasissumiit aggersuugunik aamma sumiiffissaqartariaqarput, ilisimatooq Tove Lading taamma oqarpoq.

Nunatsinni inissiat iluarsartuusassat tamaasa iluarsartuunneqassappata ikinnerpaarpaamik 6 milliardit koruuniniit naleqassasoq, Tove Lading oqarpoq.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.

Aamma atuaruk