Inatsisartut siulittaasuat Inatsisartunut inissialiorneq sipaarfiussaaq
Inatsisartut nutaanik 25-nik inissiartaartinniarneqarput.
Inatsisartut, Nuup avataani najugaqartut, ukiakkut upernaakkullu ataatsimiigiannginneranni inissarsiuunneqaqqaartarput. Ilai inissianut inissinneqartut, allat akunnittarfinnut inissinneqarsinnaasarput. Tamanna inatsiartut ukiumut nalunaarutaanni atuarneqarsinaavoq.
Inissialiuunneqarpatali tamanna allaffissornikkut malunnaatilimmik pisariillisaataassaaq, Inatsisartut siulittaasuat Vivian Motzfeldt isumaqarpoq.
- Allaffissornikkut inissianik ujarlernerit taakkua qimanneqassapput inatsisartut sineriamminngaaneersut ataatsimut aallaaveqarlutik najugaqarsinnaaneri angineqassammata.
AAMMA ATUARUK Inatsisartut imminnut salliuteqqipput
Inatsisartut siulittaasoqarfiata allagaataa naapertorlugu, ullumikkut inissianut 21-nut Inatsisartut inissianik qaammatini arfinilinni attartortarnermut 4,3 millionit koruunit aningaasartuutigineqartarput.
Inissiallu 25-t nutaat attartorneri ukiumut 3,9 millionit koruuninik akeqartussatut missingersoritsik, siulittaasoqarfik allappoq.
Taamaammat inissiartaatisineq nunatta karsianut sipaaruteqarfiussaaq politikerillu sivisunerusumik sulinissaat anguneqarsinnaassasoq, Inatsisartut siulittaasuat erseqqissaavoq.
- Inissiat ukioq naallugu Inatsisartut isersinnaaffigilissavaat killilersugaanngitsumik, taamaalillunilu ataatsimiinnerit eqaanerusutaamma maani ingerlanneqarsinnaanngussallutik, Vivian Motzfeldt taama oqarpoq.
Suleqatigiissitsisut inissialiornissamik pilersaarut isornartoqartippaat. Sanaartornermut aningaasartuutaasussat inuiaqatigiit inigisaannut pisoqaleqisunullu atorneqarsinnaagaluartut, partii isumaqarpoq.
AAMMA ATUARUK Ilaasortanut inissiat nutaat 25-t Inatsisartut sanatinniarpaat
Taassuma saniatigut napparsimmaveqarfiit, atuarfeqarfiit ilinniartulluunniit angerlarsimaffii aserfallatsaaliorneqarnerinut atorneqarsinnaagaluartut, Suleqatigiissitsisut siulittaasua oqarpoq.
Taamaakkaluartoq pilersaarutaasoq partiinit amerlanerussuteqartunit taperserneqarpoq:
- Tamanut iluaqutissaq taanna tikinniarneqarpoq, taannalu tamatsinnik amerlanerussuteqartunik qilanaarutigineqartorujussuuvoq.
Inissiat sanaartorneqarnissaat tamakkiissumik aningaasartuutissat suli oqaatigineqarsinnaanngitsoq, aammalu inissialiorneq qaqugu aallartissanersoq suli naluneqarallarpoq Inatsisartut siulittaasuata oqaatigaa.
