Suleqatigiissitsisut: Inatsisartut imminnut salliuteqqipput

Inatsisartut Nuummi upernaakkut ukiakkullu ataatsimiittarput. Ilaasortallu, Nuup avataani najugaqartut, ataatsimiigianerminni najugaqarfigisassaannik 25-nik inissialiuunneqassapput.

Taamaaliorniarnerli Suleqatigiissitsisut siulittaasuata tulliata, Tillie Martinussenip, isumassarsiatsialaasorinngilaa.

- Politikerit imminnut salliutillutik, inissianik nutaanik napparsimalernanngitsunillu, Nuummi inissaaleqiffioqisumi namminneq atugassaminnik sanaartortitsiniarnerat tunngaviatigut kukkunerusoraarput, Tillie Martinussen oqarpoq.

AAMMA ATUARUK Ilaasortanut inissiat nutaat 25-t Inatsisartut sanatinniarpaat

Inatsisartut siulittaasoqarfiat naapertorlugu inissiat nutaat attartorneri ukiumut 3,9 millionit koruuninik akeqassapput.

Aningaasanulli inatsimmi allassimavoq ukiumut 3 millionit koruunit sinnilaarlugit inissianut atorneqartartut.

Taava aamma Inatsisartut siulittaasoqarfiata allagaataa naapertorlugu, Inatsisartut inissianik qaammatini arfinilinni attartortarnermut 4,3 millionit koruunit maanna atortarpaat.

Taamaammat politikerit nutaanik inissiartaarnerat nunatta karsianut sipaarutaalluarsinnaasoq, Inatsisartut siulittaasuat erseqqissaavoq.

AAMMA ATUARUK Politikerit Noorlernut nuukkusupput

- Inissiat ullumikkut periarfissarititaasut akisoorujussuummata. Taannalu allanngortinniarneqarpoq, Inatsisartut sivisunerusumik attartorsinnaanerannut ikaarsaarsinnaasuugunik, akit taakku atuinnarlugit, ukioq ataaseq inigisinnaasat taakku periarfissat pigilissagaluarpagut, Vivian Motzfeldt oqarpoq.

Tillie Martinussennilli allatut aaqqiinissaq ujartorpaa.

- INI-p inissiataani ineqartariaqarsoraagut, Nuummimi iserfissaqartariaqarput. Inatsisartut allattoqarfiat ukiup ingerlanerani pilersaarusiorluarnerusuuppat, inuiaqatigiit inigisaasa pitsaaqataannik, akisuujunngitsunillu, pissarsisinnaassaaq.

Aningaasartuutaasussallu illuartinneqareersut, Inatsisartut siulittaasua oqarpoq:

- Demokratii akeqarpoq, aamma aningaasarpassuit ullumikkut atorneqareerput. Atorneqareerput inissianut attartortinneqartartunut, aningaasartuutigineqarlutik. Taannalu soorunami alloriarfigineqarusuppoq, aningaasat taakkua piusut atorneqartartullu iluanni, sulilu immaqa aamma annikinnerusumik, kisiannilu piffissamik sivikinnerusumik attartorfigineqarsinnaasunik, ujartuinerulluni, Vivian Motzfeldt oqarpoq. 

Inatsisartut inissiassaasa sanaartorneri ingerlannerilu inissiaatileqatigiiffiup Illuut A/S-ip akisussaaffigissavaa.