Politikerit Noorlernut nuukkusupput
Inatsisartunut ilaasortanut inissialiortoqassaaq.
Taakkulu Nuummi Noorlermiinniissaat Inatsisartut siulittaasuata kissaatigaa.
Inissiat tamanut ammasumik qaffasinnerpaamik akiliiumasumut tuniniarneqartussaagaluartut aningaasanut inatsimmi takuneqarsinnaavoq.
Inatsisartulli siulittaasuat tuniniaajunnaaqqusilluni naalakkersuisoqarfimmut saaffiginnissimasoq, e-mailikkut allaqatigiinnermi KNR-ip pissarsiarisimasaani takuneqarsinnaavoq.
Tassami sumiiffik Inatsisartut najugaqarfigisassaatut atorneqassasoq, siulittaasup kissaatigaa.
Pilersaaruterujussuit
Inatsisartullu illorsualiornissaminnik pilersaateqarput.
Ataatsimiittarfiliornissarmi tallimanngornermi oqaluuserineqarpoq.
Aamma atuaruk Inatsisartut ataatsimiittarfiat 300 millionilik sussagatsigu?
Politikerit inissiani naammaginartuusorinngisaminni ineqarnerminut akiliisarnerat inissialiortitsinissamut tunngavilersuutigineqartoq, allaqatigiinnerup takutippaa.
Ineqarnermullu naalakkersuisoqarfik inissialiornissamut siunnersuummik Inatsisartut ataatsimiinneranni uani saqqummiussissasoq, Lars-Emil Johansenip saaffiginnissutimini kissaatigaa.
Taamaalilluni suliniummut 3 millionit koruuninik aningaasaliissutissanik aappaagumut aningaasanut siunnersuummi immikkoortitsisoqarsinnaaniassammat, ukiunullu tulliuttunut suliarineqarnissaanut immikkoortitsisoqarsinnaassammat.
