Inissianut akit pisortat iluarsartuussinissaannut naammanngitsut

Karl Frederik Danielsenip inissianut akiliutit appasippallaartut nassuerutigaa, attartornermullu nutaamik inatsiseqalingajalernerarlugu.

Namminersorlutik Oqartussat inissiaataannut akiliutinik qaffaanissat politikkikkut ukiuni kingullerni aalajangiiffigineqarusunneq ajorpoq. Inissianut akiliutit nikittussaajunnaarnissaannut politikkikkut qasseeriarluni isumaqatigiittoqarnikuummat, isertitat iluarsartuussinissamut akiliutissat ikinnerupput.

Inissianut attartornermut akinik qaffaanissaq politikkikkut kajumiffigineqarsimanngimmat, inissianik Namminersorlutik Oqartussat pigisaannik 6000-inngajannik iluarsartuussinissaq ullumikkut ilungersornartorsiorfiuvoq.

AAMMA ATUARUK Namminersorlutik Oqartussat inissianik iluarsartuussinissamut kinguaattooqqaqisut

Demokraatinit 2009-mit 2013-imut ineqarnermut naalakkersuisuusimasoq, Jens Frederiksen taama oqarpoq.

- Taamani taamaaliortoqarsimanerata kingunipilorai, tassami akit qaffasissusaat malillugu inissianut akinik ingerlaavartumik qaffaasoqartanngimmat, inissiarparujussuit ullumikkut nungullavissimasut takusinnaavat, Nuuk City Development - Siorarsiorfimmi ullumikkut pisortaasoq, Jens Frederiksen oqarpoq.

Ineqarnermut akiliutinik qaffaanerit nuannarineqanngitsut

Inissiaqarnermut akiliutinik qaffaanerit innuttaasunit nuannarineqannginnerat akinik qaffaasoqartannginneranut nassuiaatigineqarsinnaagunarpoq.

Jens Frederiksen inissianik attartornermut akinik 5 procentimik 2012-imi qaffaavoq. Tamannalu qinersinermi 2013-imi qinersisigisimasarpassuaminik annaasaqarneranut pissutaaqataasoq taanna isumaqarpoq.

- Inissiat akisunerulersillugit qineqqusaarneq nuannarineqanngilaq. Tamanna taasisussakinnerunermik kinguneqarsinnaavoq, inissianilli pitsaanerusunik peqalissagutta tamanna pisariaqarpoq, Jens Frederiksen oqarpoq.

Jens Frederiksenip Inatsisartunut 2009-mi qinersisoqarneranit 2013-imi qinersisoqarneranut taasisui 1050-init 513-iinnanngorput.

Namminersorlutik Oqartussat inissiaatileqatigiiffiannit INI-mit inissianik attartornermit Namminersorlutik Oqartussat 40 millionit koruuninik 2019-imi pissarsissaaq.

Namminersorlutik Oqartussat inissianik iluarsartuussinissamut 2019-imi 90 millionit koruuninik immikkoortitsipput nutaanillu inissialiornissamut 48 millionit koruunit missaannik immikkoortitsillutik - tassa katillugit 138 millionit koruunit.

AAMMA ATUARUK Pisortat inaataani najugaqartut iluarsartuussinissamut utaqqisariaqarput

Maanna ineqarnermut attaveqaqatigiinnermullu naalakkersuisup, Karl Frederik Danielsenip (S) Jens Frederiksen isumaqatigalugu inissiamik attartornerit akii appasippallaarnerarpai.

- Naammanngitsut takutinneqarpoq. INI A/S-imit 40 millionit koruuninik pissarsivugut, taakkuli saniatigut 138 millionit koruuninik atuilluta, taamaammat inissianik attartornermut akit naammanngillat, Karl Frederik Danielsen oqarpoq.

Namminersornerullutik Oqartussat nunatsinni inissianik aqutsineq danskit naalagaaffiannit 1987-imi tiguaat. Iluarsartuussinissamullu pisariaqartitsisoqangaatsiarnera politikerinit taamanili ilisimaneqalerpoq. Taamaakkaluartorli iluarsartuussinissanut akiligassat amerligaluttuinnarput.

- Inissianut akit iluarsartuussinissamut aningaasanik immikkoortitsiffiunngitsumi siusinnerusumi inissisimanikuupput, Karl Frederik Danielsen oqarpoq.

Inissianik attartornermut akiliutinik qaffaasoqassanersoq Karl Frederik Danielsenip oqaatiginngilaa, attartornermulli inatsimmik Namminersorlutik Oqartussat inissiaataannik ilaatigut misissuiffiusussamik suliaqartoqartoq oqaatigaa. Taanna 2020-mi naammassissangatinneqarpoq.