Namminersorlutik Oqartussat inissianik iluarsartuussinissamut kinguaattooqqaqisut
Namminersorlutik Oqartussat inissiaataanni najugaqaraanni inissiarpassuit iluarsaanneqarnissaat utaqqinassaqaaq. Namminersorlutik Oqartussat inissiaataasa iluarsartuunnissaannut 1,5 milliardit koruunit amigaatigineqartut, kisitsisit kingulliit 2016-imeersut takutippaat, amigaatillu 100 milliuunit koruuninik taamanerniilli suli annerulersimasoq, ineqarnermut attaveqaqatigiinnermullu Naalakkersuisoqarfiup paasissutissiissutigaa.
Naak Namminersorlutik Oqartussat inissiaataasa iluarsartuunnissaannut ingutsernissaannullu milliardit pisariaqartinneqaraluartut 2019-imut aningaasanut inatsimmi 90 millionit koruuniinnaat immikkoortinneqarput.
AAMMA ATUARUK Nunatsinni inissiat affaasa missaat nutartertariaqarput
Inissiat uninngatiinnarneqarsimanerat pissutigalugu pissutsit taamaalersimasut, Tove Lading DTU Bygimi lektori issittumilu sanaartornermik immikkut sammisaqartuusoq isumaqarpoq.
- Aserfallatsaaliuisoqartariaqarpoq, taamaaliunngikkaannilu iluarsaassassat amerligaluttuinnartarput piffissallu ingerlanerani ajorsigaluttuinnartarlutik, Tove Lading oqarpoq.
2016-imi nalunaarsuutit naapertorlugit Namminersorlutik Oqartussat 6000-it missaannik inissiaateqarput. Taakkunannga 1169-it ukiut tallimanngortinnagit ingutserneqartariaqartuupput. Inissiat 4544-t “iluarsineqarsinnaanngitsutut” ipput, inissiallu 217-it ajoratik.
Pilersaaruteqanngitsoq
Inissianut tunngatillugu 2016-ip kingorna nutaanik kisitsiseqanngilaq, tamannalu ajornartorsiutaangaatsiartoq, lektori, isumaqarpoq.
- Isumaqarpunga inuiaqatigiinni ajornartorsiut taama angitigisoq iluamik iliuuseqarfigineqannginnera ajornartorsiutaasoq, Tove Lading oqarpoq.
Taassuma ajornartorsiutaasup piffissap ingerlanerani qanoq iliuuseqarfigineqarnissaanut ataatsimoortumik pilersaaruteqannginnera isornartuusoraa, aammattaaq piffissami mittarfinnik napparsimmavinnillu sanaartorfiusussami.
AAMMA ATUARUK Nye boliger vil sikre bedre deltagelse i samlingerne
- Imaanngilaq Namminersorlutik Oqartussat maannakkorpiaq aningaasarpassuaateqartut, aningaasallumi assigiinngitsorpassuarnut atorneqartussaapput, kisianni pilersaarusiortoqartariaqarpoq, taamaanngippammi ajornartorsiut ukiut ingerlanerini alligaluttuinnassaaq, Tove Lading oqarpoq.
Naak qasseeriartumik saaffiginnittaraluarnermi naalakkersuisumit akisussaasumit, Karl Frederik Danielsenimit oqaaseqartitsiniarnerput iluatsissimanngilaq.
Iluarsartuussassa sooq amerrliartuinnarsimanersut akissutersiniaraluarparput. Aammattaaq ajornartorsiut qanoq iliornikkut aaqqiiviginiarneqarnissaanut pilersaaruteqarnersoq apeqqutigerusukkaluarparput. Taakku saniatigut ajornartorsiutip siunissami qaninnerusumi aaqqiivigineqarnissaa piviusorsiortuunersoq paasiniarniaraluartigu, KNR-imiilli akissutissarsinngilagut.
AAMMA ATUARUK Assiliartalersugaq: Inatsisartut inissiassaat ima ilisimasaqarfigaagut
