Naalakkersuisoq Pisortat inaataani najugaqartut iluarsartuussinissamut utaqqisariaqarput
Inissianut iluarsartuussinissamut 2019-imi aningaasanik 90 millioner koruuninik immikkoortitsisoqarpoq, aningaasalli iluarsartuussinissamut 1,7 milliarder koruunit pisariaqartinneqartut, naalakkersuisoq oqaluttuarpoq.
Taamaammallu nunatsinni Namminersorlutik Oqartussat inissiaataasa iluarsartuunissaannut aningaasat taama ikitsigitillugit najukkanut pitsanngorsagassanut piffissaq sivisussasoq, naalakkersuisup nassuerutigaa.
- Takusinnaasarput malillugu naatsorsuutigisarpullu malillugu ukiut immaqa 16-it missaani qaangiuppata uani aserfallattaaliineq taamatut isikkoqartoq qaangerniarsarisimassagipput, Ineqarnermut Naalakkersuisoq Karl Frederik Danielsen (S) taama oqarpoq.
AAMMA ATUARUK Namminersorlutik Oqartussat inissianik iluarsartuussinissamut kinguaattooqqaqisut
Namminersorlutik Oqartussat inaataani 6000-it missaqartuni 217-it ajunngitsutut nalunaarsorneqarput, sinneri iluarsartuusassaallutik ingutsigassaallutilluunniit. Namminersorlutik Oqartussat namminneq nalunaarusiaanni 2016-imeersumi taamanna ersippoq, ukiunilu pingasuni allannguisoqanngilaq.
AAMMA ATUARUK Naalakkersuisut iliuuseqartariaqalerput
Aningaasanut Inatsimmi aningaasaliissutigineqartartut ikippallaartut pingasoriaammillu amerlineqartariaqartut Inatsisartunut ilaasortaq IA-meersoq Peter Olseni isumaqarpoq.
Naalakkersuisoq isornartorsiummut paasinnilluni oqarpoq, akisussaaffilli Inatsisartunut miloriuteqqillugu:
- Naalakkersuisut taanna annerusinnaatsissappassuk Inatsisartuninngaanniit tassa qujarutissaqaarput, Ineqarnermut Naalakkersuisoq Karl Frederik Danielsen (S) taama oqarpoq.
Aningaassaliissutigineqartartulli ilaqqinniarneqarpasinngillat. Siumukkut aamma Demokraatit isumaqarput suliassaqarfimut aningaasaliissutit ilaqqineqartariaqanngitsut.
