Siumup oqaaseqartartua Naalakkersuisut iliuuseqartariaqalerput
Tuaviupilunnerup kukkuffiusinnaasarnera, ineqarnermut naalakkersuisup oqaasinnarisimaqqooqaa. Tassami Namminersorlutik Oqartussat inissiaataat 1,5 milliardit koruunit nalinginut iluarsaattariaqarlutik, inissaqartitsiniarnikkut pissutisit ilungersunartut iluarsiniarlugit, Naalakkersuisut ineqarneq pillugu 2014-imili iluarsaaqqinnissamik pilersaaruteqarput suli piviusunngunngilaq.
Naalakkersuisut suli taamaaliunngimmata, Siumup oqaaseqartartuata, Anders Olsenip (S) isornartorsiorpai:
- Isumaqarfigisarput tassaavoq ineqarnikkut aaqqissuusseqqinneq pillugu Naalakkersuisut saqqummiunniagaat taanna massakkut piaarnerpaammik suliarineqarluni pisariaqartoq.
AAMMA ATUARUK Namminersorlutik Oqartussat inissianik iluarsartuussinissamut kinguaattooqqaqisut
Aaqissuuseqqinnissaq utaqqissunneqarpoq
Soorlu 2014-imi taamaattoq, Naalakkersuisoqatigiinnissamik isumaqatigiissummi kingullermi 2018-imeersumi ineqarneq pillugu iluarsaaqqinnissaq kissaataasoq allassimavoq. Tassalu naalakkersuisoqatigiit ineqarnikkut aaqqisuuseqqinnissaq suliarineqassasoq kissaatigigaat toqqaannartumik allassimavoq.
Aaqqissuusseqqinneq imaluunniit naammik - Namminersorlutik Oqartussat inissiaataannut iluarsartuussinissamut aningaasat amerlanerusut atorfissaqarput.
Namminersorlutik Oqartussat inissiaataasa iluarsartuunnissaannut 1,5 milliardit koruunit amigaatigineqartut, kisitsisit kingulliit 2016-imeersut takutippaat, amigaatillu 100 milliuunit koruuninik taamanerniilli suli annerulersimasoq, ineqarnermut attaveqaqatigiinnermullu Naalakkersuisoqarfiup paasissutissiissutigaa.
AAMMA ATUARUK Nunatsinni inissiat affaasa missaat nutartertariaqarput
Inissianut iluarsartuussinissamut 2019-imut aningaasanik 90 millioner koruuninik immikkoortitaqarpoq. Aningaasalli taama amerlassusillit atortaraanni, inissiat iluarsassassat ukiut 30-it 40-it aatsaat qaangiuppata tamakkerneqarsinaasut Inuit Ataqatigiit isumaqarput.
- Annikippallaarujussuarput 90 millionit, amerlanerujussuusariaqarput minnerpaamik marluk pingasoriaatigisariaqaraluarpaaluunniit taammatut ukiumut aningaasaliissutigisartakkavut, Peter Olsen Inuit Ataqatigiinneersoq taama oqarpoq.
Aaqqissusseqqinnissaq suli sulissutigineqarpoq
Siumup ineqarnermut oqaaseqartartuat Anders Olsenip, aamma partii tapersersortaasut Demokraatineersoq Justus Hansenip aningaasaliisoqaqqinnissaannik oqaaseqarnissartik tunuarsimaassutigaat.
- Tigussaasunik pilersaaruteqalerpat aningaassat aamma aningaasaqarneq tulliusinnaapput. Maannakkorpiaq aningaasersuiniaannarluni aningaasalersuisoqartariaqanngilaq Justus Hansen Demokratineersoq taama oqarpoq.
Qaqugu aaqqissuusseqqittoqarumaarnersoq erseqqissumik oqaatigineqanngilaq.
Isornartorsiuisoqarnera KNR-ip Karl Frederik Danielsenimut isummerfigeqquaa. Taassuma isornartorsiuineq paasiuminaatsinnerarpaa, ineqarnermillu aaqqissuusseqqinnissamut atatillugu arlalinnik suliniuteqartoqarsimanera, attartortitsisanermullu inatsisiliortoqarnera innersuussutigalugu, inatsisissaq taanna 2020-mi naammassineqartussatut naatsorsuutigineqarpoq.
