Inissiat oqullit suli ajornartorsiutaasut: Ineqarnermik aaqqissuusseqqinneq inaarsarneqarpoq
Nunatsinni inissiat ilaasa oqoqarnerat ukiorpassuarni ajornartorsiutaasoq suli ajornartorsiutaavoq.
Namminersorlutik Oqartussat inissiaataanni nakkutiginnittoq Ini A/S ilisimatitsivoq Namminersorlutik Oqartussat inissiaataat attartukkat 70-it oqoqartut.
Nuummmi inuit 60-it missarluinnaasa maanna inigisaat oqoqarmata aserfallassimammatalu initaartinneqarallarnissamik utaqqipput.
- Namminersorlutik Oqartussat inissiaataanni attartukkat 70-it oqoqalersimapput.
- Nuummi inuit 60-it missarluinnaasa maanna inigisaat oqoqarmata aserfallassimammataluunniit initaartinneqarallarnissamik utaqqipput.
- 15 millionit koruunit 2023-mut aningaasanut inatsisissamit inissianik oqoqalersimasunik iluarsartuussinissamut illikartinneqarput.
Tusarfiit: INI A/S, 2023-mut aningaasanut inatsit.
Inissiani oqoqarnera ajornartorsiutaaqaaq, ineqarnermut naalakkersuisoq Erik Jensen (Siumut) oqarpoq:
- Taamaattoqarnera uggornarlunilu ajuusaarnarpoq. Taamaammat inissianik qanittukkut iluarsartuussisoqarnissanut arlalinnik suliniuteqarpugut, Siumumeersoq Erik Jensen oqarpoq.
Inissianik iluarsaasoqassasoq
15 millionit koruunit 2023-mut aningaasanut inatsisissamit inissianik oqoqalersimasunik iluarsartuussinermut atugassatut illikartinneqarput.
Tamatuma saniatigut 70 millionit koruunit inissianik iluarsartuussinermut aserfallatsaaliuinermullu atugassatut illikartinneqarput.
Aningaasat taakku agguarlugit inissianik oqoqalersimasunik iluarsartuussinermut atorneqassasut, naalakkersuisoq Erik Jensen oqarpoq.
AAMMA ATUARUK Nuummi inissarsiortorpassuusut – taamaakkaluartorli inissiat 100-init amerlanerusut inoqanngillat
Ineqarnermik aaqqissuusseqqinneq Naalakkersuisut aamma inaarsaleruttorpaat, taannalu ilaatigut inissianik iluarsartuussinissamut tunngasunik imaqarpoq.
- Ineqarnermik aaqqissuusseqqinneq politikkikkut suliarereerparput, Inatsisartuni partiinit assigiinngitsunit upernaaru siammasissumik isumaqatigiissusiornikkut akuerineqarlunilu ilusilersorneqarnissaa pingaaruteqarpoq, Erik Jensen oqarpoq.
Ineqarnermik aaqqissuusseqqinneq inaarsarneqaleruttortoq, Erik Jensenip KNR-imut oktobarimi aamma oqaatigaa.
- Namminersorlutik Oqartussat inissiaataat 6000-t missaanniipput.
- Aningaasaqarnermut Siunnersuisoqatigiit oqarnerat naapertorlugu Namminersorlutik Oqartussat kommunillu iluarsaassinissamut kinguartoorutaat 3,7 milliardit koruunit 3,9 milliardit koruunillu akornanniipput.
- Namminersorlutik Oqartussat innissiaataanni 6000-t missaanniittuni 217-iinnaat najugaqarfigineqarsinnaasut inssiaataasalu sinneri ingutserneqartariaqartutut nalilerneqartut, Namminersorlutik Oqartussat 2016-imi nalunaarusiaanni erserpoq
Ineqarnermik aaqqissuusseqqinneq qaqugu inaassavisiuk?
- Qanittumi. Inatsisartut upernaaru ataatsimiilereeriarpata siammasissumik politikkikkut isumaqatigiissusiorsinnaanngussaagut.
Ineqarnermik aaqqissuusseqqinnermi salliutitasi suuppat?
- Partiit oqaloqatigeqqaartinnagit oqaatigisinnaanngilakka. Uissuumminartuunngillalli. Inissiat pit-sanngorsarneqarnissaat pingaarnerpaavoq, inissianillu iluarsaassinermut kinguartooruteqarnerujussuarput iliuuseqarfigissavarput, Erik Jensen oqarpoq.
AAMMA ATUARUK Naalakkersuisoq: Ineqarnermik aaqqissuusseqqinnissaq piareersarneqaleruttorpoq
Inissiat ilaasa oqoqarnerat ukiorpassuarni ajornartorsiutaavoq. Oqoqalersimasunik inigisaqartoqarunnaarnissaa Naalakkersuisut anguniarpaat?
- Inissianik oqoqalersimasunik iluarsartuussisoqareeraangat inissiat allat aamma oqoqalersimasarmata, tamanna massakkut oqaatigisinnaanngilara. Inissiat ilarpassui 1960-1970-ikkunneersuummata aserfallassimaqimmatalu iluarsaassinermut kinguartooruteqarujussuarpugut, Erik Jensen oqarpoq.
Namminersorlutik Oqartussat kommunillu iluarsaassinissamut kinguartoorutaat 3,7 milliardit koruunit 3,9 milliardit koruunillu akornanniittut, Aningaasaqarnermut Siunnersuisoqatigiit nalunaarusiaanni 2022-mi septembarimi saqqummersumi allaqqavoq.