Politiit ullormut nalunaarutaat: SAR-imik imaani annaassiniarneq Tasiilamilu ikuallattoq

Aqutsisinnaajunnaarsimanermik Aasiaat Radioanut ippassaq nal. 07.40 nalunaaruteqartoqarpoq. 

Sumik aqutsisinnaajunnaartoqarsimanersoq ilisimaneqanngilaq, Nuulli eqqaaniissimavoq, sillimasut pisortaat oqarpoq. 

Issittumi Sakkutooqarfik annaassiniaapallassimavoq angallallu tingerlaatilik ikkarlissimasoq siumorlugu.

Inuit sisamat tingerlaatilimmiittut ajorsimanngillat. Angallatip aquttarfia ajoquserneqarsimavoq politiillu aamma Issittumi Sakkutooqarfiup angallatip Nuummukaannerannut ikiuupput, sillimasut pisortaat oqarpoq.  

Ullormi nalunaaruterpassuaqartoq

Sillimasut pisortaata atornerluisoqarsimaneranik, nakuusertoqarsimaneranik, ikuallattoqarsimaneranik angerlarsimaffimmilu eqqissiviilliortoqarneranik nalunaaruteqartoqarsimasoq aamma oqaatigaa. 

- Ullormi pisorpassuaqarmat ulapippugut, sillimasut pisortaat oqarpoq. 

Nalunaarutit sumiiffinniit assigiinngitsuneersuupput, Aputsiaq Hansen oqarpoq. 

Tasiilami tupermi ikuallatsitsisoqarsimavoq, ajoqusertoqarsimananili. 

Inuk taanna ikuallatsitsisutut pasineqarpoq politiillu ikuallatsitsisup nammineq tuperminik ikuallatsitsisimanersoq misissorpaat.