Kalaallit Nunaat pillugu isumaqatigiissut Danmarkimi politikkikkut tapersersorneqartoq
Mette Frederiksen, Jens-Frederik Nielsen Donald Trumpilu New Yorkimi sanileriillutik isumaqatigiissummik atsioqatigiipput.
Allattoq Ritzau
septembarip 23-at 2026 08:01
Nutserisoq Brian Jensen
Danmarkip, Kalaallit Nunaata USA-llu isumannaallisaanermut illersornissamullu isumaqatigiissutaat politikkikkut tapersersorneqangaarpasippoq.
Isumaqatigiissut Kalaallit Nunaanni inatsisartuni, Danmarkimilu Folketingimi akuerineqaqqaartariaqarpoq.
Assersuutigalugu partiinit soorlu Venstremit, Konservativinit, Enhedslistenimit Danmarksdemokratinillu isumaqatigiissut nersualaarneqarsimavoq.
Isumaqatigiissut FN-ip ataatsimeersuarneranut atatillugu New Yorkimi statsministerimit Mette Frederiksenimit (S), Kalaallit Nunaata naalakkersuisuisa siulittaasuannit Jens-Frederik Nielsenimit USA-llu præsidentianit Donald Trumpimit marlunngornermi atsiorneqarpoq.
‘Isumaqatigiissut asseqanngitsoq’
Trumpip arlaleriarluni - nunanilu tamalaani isumannaatsuunissaq pineqarmat- Kalaallit Nunaata pigilernissaa kissaatigalugu oqaatigaa.
Venstrep siulittaasuata Troels Lund Poulsenip isumaqatigiissut “nalinginnaanngitsumik pitsaasutut” taavaa.
Troels Lund Poulsen taamanikkut naalakkersuisuni Venstreni illersornissamut ministeriugami, Trumpillu aqutsisuisa ajornartorsiut aaqqinniarsarimmassuk, isumaqatigiissutip naammassineqarneranut pingaarutilimmik inissisimaffeqarsimavoq.
- Kalaallit Nunaannut, Danmarkimut, naalagaaffeqatigiinnermut USA-millu siunissami suleqateqarnissamut ulloq manna nuannersuuvoq, taanna TV 2-mut marlunngornermi oqarpoq.
Mette Frederiksen New Yorkimi qallunaat tusagassiortuinut katersortitsigami Troels Lund Poulsen immikkut ilaatigut qujaffigaa. Isumaqatigiissutip piviusunngornera Troels Lund Poulsenip „tupinnartutut“ oqaatigaa.
Nersualaarinerup kingunerisai
Konservativit siulittaasuata, Mona Juulip, isumaqatigiissut Facebookimi nersualaarpaa.
Taamaattumik isumaqatigiissuteqarnissap tungaanut politikkikkut inuillu oqartussaaqataaneratigut suliaqarluarsimaneq nersualaarlugu allappoq.
Aamma Danmarksdemokratit siulittaasuannit, Inger Støjbergimit, naalakkersuisunik nersualaarivallaanngitsumit, tapersersorneqarlunilu nersualaarneqarpoq.
- Isumaqatigiissut tulluusimaarutigisinnaavarput, oqartussaassutitsinnik erseqqissaammat, Natollu nunamiittuarnissaanik qulakkeerinnimmat, TV 2-mut marlunngornermi Inger Støjberg oqarpoq.
Partiip naalakkersuisunik tapersersuisup, Enhedslistenip, aamma tamanna tapersersorpaa.
- Isumaqatigiissut taanna qallunaat oqartussaanerannik allannguinngilaq. Kalaallit Nunaata Danmark USA-llu isumaqatigiissuteqarfigereersimammassuk. Killigititaasuni aappalaartoq avaqqunneqanngilaq, partiip Kalaallit Nunaat pillugu oqaaseqartartua Trine Pertou Mach Jyllands-Postenimut marlunngornermi oqarpoq.
