Nuummi inissarsiortorpassuusut – taamaakkaluartorli inissiat 100-init amerlanerusut inoqanngillat
Nuummi inissarsiornerneq pillugu suliaq ajornaatsuunngilaq.
Inissarsiortut amerlangaatsiarput, inissiaatileqatigiiffillu INI aqqutigalugu inissarsiorneq inissaq angissusaa apeqqutaatillugu ukiut pingasut missaannik – tassa ulluni 948-nik sivisussuseqarpoq.
Taamaakkaluartorli Nuummi inissiat, Namminersorlutik Oqartussat pigisaat ukioq manna aggustip ulluisa 31-anni inoqanngitsut 106-iupput. INI KNR-imut taama paasissutissiivoq.
- Nuummi Namminersorlutik Oqartussat inissiaataat inoqanngitsut aggustip 31-ani 106-iupput.
- Inissiat aserfallangaatsiarsimanerat oqoqarneralluunniit pissutaavoq.
- Inissiat inoqannginnerat agguaqatigiissillugu ukiup aappaata affaanik tassa ulluni 540-ni inoqarneq ajorput.
- Nuummi Namminersorlutik Oqartussat inissiaataat ukiumut agguaqatigiissillugu 42.848 koruuneqartarpoq.
- Inissiat inoqanngitsut 106-it ukiumut akileraarutinut 4,5 millionit koruuneqarput.
Paasissutissarsiffik: INI
Tamanna inissiat nungullarluinnarsimanerannik imaluunniit oqoqarnera pissutigalugu najugaqarfigineqarsinnaannginnerannik pissuteqarpoq. Taamaammat nutarterneqarnissami imaluunnit iluarsartuunneqarnissami tungaannut inoqanngillat.
Inissiat agguaqatigiissillugu ukiup affaanik sivisussuseqartumi inoqassanngillat.
Tamanna ajornartorsiutaasoq, ineqarnermut naalakkersuisup, Siumumeersup Erik Jensenip nassuerutigaa.
- Soorunami nunarput tamakkerlugu ajuusaarnartuuvoq, Namminersorlutik Oqartussammi inissiaataanni aserfallatsaaliinissamut kinguaattoorutit 2,1 milliardinit 2,3 milliardiupput. Tamanna politikkikkut suliniuteqangaatsiartoqartariaqarneranut aamma uppernarsaataavoq, Erik Jensen oqarpoq.
Ineqarnermut akiliutaasartut igiinnarneqartut
Namminersorlutik Oqartussat Nuummi inissiaataanni inigisamut akiliut agguaqatigiissillugu 42.900 koruuniuvoq – taamaammat inissianit 106-init inimut akiliutinit ukiumut annaasat 4,5 millionit koruuniuvoq.
AAMMA ATUARUK Tasiilami inissaaleqineq neriuuteqannginnerlu unammillernartut
Nunatsinnili illoqarfiit pingaarnersaanni inissaaleqineq ajornartorsiutaajuarpoq.
Ajornartorsiutaasoq sooq siusinnerusukkulli salliutinngilisiuk?
- Soorunami iliuuseqarfiginikuuarput. Suliniut assigiinngitsut ingerlappagut, assersuutigalugu inissiat oqoqartut iluarsaannerannik suliaqartoqangaatsiarnikuuvoq.
Nuummi inissarsiortorpassuarnut inissiat 100-init amerlanerusut inoqaratik nutarterneqarnissamut utaqqisiinnarneqarnerat tusarlugu eqqumiigineqarsinnaavoq.
- Paasisinnaalluarpara. Taamaammat aamma akuerineqarsinnaanngitsoq oqarpunga, taamaammallu pisariaqartunut assigiinngitsunik suliniuteqarpugut. Aamma aappaagumuinnaanngitsoq imaluunniit qaammatip tullianuinnaanngitsoq, siunissarli eqqarsaatigalugu, Erik Jensen oqarpoq.
Piffissaq ungasinnerusoq eqqarsaatigalugu qanoq suliniuteqartoqarniarnersoq ineqarnermut naalakkersuisut suli akissuteqarfigisinnaanngilaa.
Taassumali Naalakkersuisut aningaasanut inatsisip isumaqatigiinniutigineqarnerata ilaatut ineqarnermut aaqqissuusseqqinnissamik suliaqartut paasissutissiissutigaa.