Tasiilami inissaaleqineq neriuuteqannginnerlu unammillernartut
Ullualunnguit ingerlaneranni utertoortoqarmat aningaasarsisoqarlunilu, Tasiilami inunnik isumaginninnermi suliaqartunut artukkiingaatsiarpoq, oqartussaasullu akulerutsinneqartariaqarlutik.
Inuppassuit erngupput, ullulualunnguillu ingerlaneranni angerlarsimaffinni meerartaqartuni eqqissiviilliornerit 15-t, imminut toquttut marluk, imminut toqunnisaminnut sioorasaarisut sisamat pinngitsaaliinerlu ataaseq politiinut unnerluutigineqarput.
inuppassuit inuunerminnik tunniutiinarpasipput, imigassarlu qimaaffigineqarluni, Kevin Perry oqarpoq.
Taamaakkaluartoq Tasiilami susoqartoruna, soormitaavanalu nunatta sinneranut sanilliullugit inuiaqatigiinni ajornartorsiorpasinnerusartut?
Tamanna pillugu Kevin Perry KNR-imiit apersorneqarpoq. Taanna Ilisimatusarfimmi inuiaqatigiilerinermi lektoriuvoq isumaginninnermullu siunnersortinngornianut ilinniartitsisuuvoq.
AAMMA ATUARUK Tasiilami akissarsiffiup utertoornerullu kingorna ajornartorsiuterpassuit
- Meerarpassuit sooruna atuartariaqarnertik apeqqusertaraat, Tasiilami atuarfimmi pisortaanikoq oqaloqatigigakku oqarpoq. Taasumallu akivai siunissami ilinnialerniassammata. Akissutigineqakkajuttorlu tassaavoq, suna siunissaq? Inuit ukiukitsunnguullutilli pakatsisarsimarpasipput, Kevin Perry oqarpoq.
Inissaaleqineq najugaqatigiiaallu amerlavallaarnerat ajornartorsiutigineqartut
Kevin Perry malillugu unammillernaqisut ilagaat inissaqarniarnermut tunngasut. Illoqarfissuarni inissaaleqisoqangaatsiareeraluartoq, Tasiilami inissaminerni najugaqatigiippassuit takussaanerupput.
AAMMA ATUARUK Tage Mikiki frygter, når alkoholsalg åbner i Tasiilaq: Vil vi miste vores kære?
- Inissiarpassuarni inunnut sisamaanarnut naleqqussagaasuni, ilaatigut inuit 20-t najugaqatigiittarput. Inissaaleqisoqarpoq, tamannalu inuit eqqarsartaasaanut timaanullu peqqissusaanut sunniuteqarpoq, taanna oqarpoq.
- Tasiilami nunaqarfiinilu, ullumikkut tallimanngornermiit septembarip 17-iata tungaanut atuutilersumik, aalakoornartutalinnik imigassaarniarneq matuvoq.
- Tamanna niuertarfinni imerniartarfinnilu atuuppoq.
- Nunaqarfiit tassaapput Kuummiut, Isertoq, Tiilerilaaq, Sermiligaaq Kulusullu.
- Kalaallit Nunaata kangiani kimittuunik imigassaarniartoqanngilaq.
- Tasiilami nunaqarfiinilu Ittoqqortoormiinilu, aalakoornartutalinnik imigassanik 15 procentinit kimittunerusunik sassaalliineq tuniniaanerlu inerteqqutaavoq.
Tamanna meeqqanut unammillernarpoq, eqqissillutik ilinniakkerisinnaajunnaarneranik ilinniaqqinnissaminullu periarfissanik kinguaattoorutigisartagaannik.
Inuit inuunerminni tunniutiinartut
Kevin Perry Tasiilamut tunngasunik immikkut ilisimasaqartuunani naqissuserpaa - taamaallaalli inooqatigiinermi immikkut ilisimatusartuunini atorlugu isigisani tunngavigai.
- Ilisimatusaatitut misissuinernik tunngaveqarlunga akissutissaqanngilanga, inuppassuilli inuunerminnik tunniutiinarpasipput, imigassarlu qimaaffigineqarluni, taanna oqarpoq.
Taassuma maanna pissutsinut kikkut akisussaasuunersut qularutiginngilaa. Tassa kalaallit oqartussaasui Naalakkersuisut Kommuneqarfik Sermersoorlu.
AAMMA ATUARUK Immikkoortortami pisortaq imigassamik inerteqquteqarneq pillugu: Tasillami unikaallannissaq pisariaqartipparput
Kevin Perryp oqarnera naapertorlugu ineqarnermut politikki ajornartorsiutaasuni pingaarneruvoq, taanna 1989-imili akisussaaffigineqalerpoq.
- Suliniutinik assigiinngitsunik aallartitsisariaqarput, tanna oqarpoq, nunalu tamakkerlugu isumaginninnermi inissianik sanaartornerup pitsaanngorsarnissaanut piitsuunerullu akiorniarnissaanut suliniuteqarnissaq pisariaqartoq oqaatigalugu.
Tasiilami ajornartorsiutit nutaajunngilluinnarput. Taakku ukiuni qulikkuutaani ajornartorsiutaapput, Tasiilarlu DR-ip piviusulersaarutaata "Byen hvor børn forsvinder"-ip aallataatinneqarnerata kingorna ukkatarineqangaatsialerluni.
Aallakaatitassiap kingunerisaanik isumaginninnermi ajornartorsiutaangaatsiartut annikillisarnissaanut suliniutinik arlalinnik aallartitsisoqarpoq.
- Imminut assortulaarpoq. Illoqarfiit ataasiakkaat pillugu piviusuinnik isiginnaagassiaqartoqarnerata kingorna ukkatarineqangaatsialertartut takugajupparput, piffissalli ingerlanerani ukkatarinnittoqarunnaartarpoq, tamatumalu saniatigut suliniutit aallartinneqarsimasut pitsaajunnaartarlutik, Kevin Perry oqarpoq.
