Tasiilami akissarsiffiup utertoornerullu kingorna ajornartorsiuterpassuit

Imminut toquttut marluk, toqunnissamik siorasaarisut sisamat, pinngitsaaliineq ataaseq angerlarsimaffimmilu eqqissiviilliornerit 15-it.

Akileraarutinik aggustip ulluisa 30-anni utertoortoqarnerata kingorna Tasiilami paatsiveqanngitsoqarpoq.

Tamanna Tasiilami Politiini politikommissæriugallartoq, Aqqalu Petersen oqarpoq.

- Tasiilami inuit aalakoortut isumaginissaat, taakkulu kingorna suliarujussuit sulissutiginissaat 30-ata kingornali ulapputigilerpagut.

Taassuma aqqusinermi aalakoortut arlaliusimasut oqaatigaa, taakkuli politiit ataasinngormalli suliaanni ajornerpaanngillat.

- Imminut toquttut marluk, pinngitsaaliisoq, nakuuserneq, angerlarsimaffimmi meeqqanik ilaqartuni eqqissiviilliornerit aqqusinermilu perulluliornerit ulapputigaagut.

Aqqalu Petersenip suliarpassuit unitsinneqarnissaannut qanoq iliortoqarsinnaanera oqaatigiuminaatsippaa. Angajoqqaat erngunneranni meeqqat angerlarsimaffiup avataanut inissinneqarnissaat sukkasuumik aaqqiissutissaasinnaagaluarpoq.

- Inuilli imigassartornerminnik imminut aqussinnaagunik pitsaanerpaassaaq. Angerlarsimaffimmi meerartaqaraanni imilernermi meeqqat ilaquttanut nalunngisanulluunniit paaritinneqarsinnaapput.

- Ullut marluk ingerlanerani pinngitsaaliinerit, nakuusernerit imminullu toqunnerit tamarmik imigassartorsimanermut attuumassuteqarput, Aqqalu Petersen oqarpoq.

Naqqiut: Aqqalu Petersen KNR-imut siullermik ilisimatitsivoq Tasiilami pinngitsaaliinerit arfiniliusimasut. Kisianni "ataasiinnaq" pinngitsaalineqarsimasoq nalunaaqutaq 14.13 ilisimatitsivoq. Tamannalu allaaserisami qulaatungaani naqqiutigivarput.