Tasiilami inuusuttoq: Imigassaarniarnerup ammaqqinnissaa ernumanaqaaq
Tasiilami nunaqarfinnilu qanittuani imigassamik tuniniaanerup ulluni 14-ini matoqqqareerluni ammaqqinneqarnissaa ernumanarpoq.
Tasiilarmiu 19-inik ukiulik taama oqarpoq.
Tasiilami sapaatit akunnerat kingulleq naasoq imigassartorfiunngimmat toqqissisimanarpoq:
- Tasiilami nunaqarfiinilu, ullumikkut tallimanngornermiit septembarip 17-iata tungaanut atuutilersumik, aalakoornartutalinnik imigassaarniarneq matuvoq.
- Tamanna niuertarfinni imerniartarfinnilu atuuppoq.
- Nunaqarfiit tassaapput Kuummiut, Isertoq, Tiilerilaaq, Sermiligaaq Kulusullu.
- Kalaallit Nunaata kangiani kimittuunik imigassaarniartoqanngilaq.
- Tasiilami nunaqarfiinilu Ittoqqortoormiinilu, aalakoornartutalinnik imigassanik 15 procentinit kimittunerusunik sassaalliineq tuniniaanerlu inerteqqutaavoq.
- Taanna assut iluaqataavoq, weekendi assut nipaaqaaq imaqaqaaq imertoqanngitsoq. Imerniartarfiit ammanngimmata nipaaqaaq, arlaatigullu assigiinngitsunik sammisaqarnarlunilu inuusuttut aamma arlaannik sammisassarsiornerat malunnaqaaq, 19-inik ukiulik Tage Mikiki taama oqarpoq.
AAMMA ATUARUK Tasiilarmiut imminnut paarinissaminnik neriorsoqatigiittut
Tasiilami sapaatit akunnerata aallartinnerani akissarsisoqarlunilu utertoortoqarmat, inuit marluk imminut toqupput, inuit sisamat imminut toqunnissamut sioorasaaripput, angerlarsimaffinni 15-ini eqqissiviilliortoqarpoq ataaserlu pinngitsaalineqarluni.
Taamaammat imigassanik aalakoornartortalinnik tuniniaanerup unitsinneqarnissaa, kommunalbestyrelsimut peqqinnissaqarfiup qinnutigaa. Qinnuteqaat Kalaallit Nunaata Politiivinit ilalerneqarpoq, tamannalu Naalakkersuisunit akuerineqarpoq.
Ernumaneq
ullulli 14-it imigassamik tuniniaanermi matoqqatitsiffiusut qaangiuppat, inuillu imigassartoqqilerpata, pissutsit sakkortuut uterfigineqaqqinnissaat, Tage Mikikip ernumanartippaa:
- Imigassap ammaqqinnissaanut ernumavunga arlaannik pisoqaqqissagaluarpat. Taamatut ullut 14-it imernikuunatik ernguteqqilerpata ernumanartoqartippara. Tage Mikiki oqarpoq imalu itisiliivoq:
- Soorlumi taama pisoqaqqissasoq annaasaqaqqilluta.
Tasiilami inuusuttut sammisassakippallaartut taana isumaqarpoq.
- soorlu 25-iliisimagaanni fritidsklubbimut kulturhusimulluunniit iseqqusaanngillat.
AAMMA ATUARUK Tasiilami aalakoornartutalinnik imigassaarniarneq matuneqartoq
Taanna Tasiilap katersortarfiani tallimanngorpat arfininngorpallu imigassartaqanngitsunik nipilersorluni qititsitsiniarluni pilersaaruteqarpoq.
Taannalu Tasiilami pissutsinik allanngortitserusuttuni kisimiinngilaq. 36-nik ukiulik Aron Kristiansen suliniummik nutaamik tallimanngormat aallartitsivoq:
- Illoqarfiup qeqqanut kaammattuivunga aqqarnup qeqqa naneruummik ikitsissalluta. Tassani immitsinnut paarinissamut neriorsoqatigiinnissaq siunertaavoq. Ulluni kingullerni pisut sakkortugamik, Aron Kristiansen KNR-mut arfininngormat oqarpoq.
Inuit 30-t missaanniittut Aronip aaqqissuussaanut tallimanngormat unnukkut takkupput.
Takkuttut ammalortunngorlutik taartumi naneruutinik oqarasuaammilluunniit angallattakkap qaammartartuanik ikumatitsipput.