Tasiilami aalakoornartutalinnik imigassaarniarneq matuneqartoq
Tasiilami nunaqarfiinilu, aalakoornatutalinnik imigassaarniarneq ullumi tallimanngornermit aallartittumik, sapaatit akunnerini marlunni, ingerlaannaq atuutilersumik matuneqarpoq.
Tassa niuertarfinni imerniartarfinnilu, ullumikkut aallartittumik, sapaatit akunneri marluk ilanngullugit, tassa septembarip 17-iata tungaanut, aalakoornartutalinnik imigassaarniartoqassanngilaq.
Kommuneqarfik Sermersooq taama nalunaarpoq.
- Tasiilami nunaqarfiinilu, ullumikkut tallimanngornermiit septembarip 17-iata tungaanut atuutilersumik, aalakoornartutalinnik imigassaarniarneq matuvoq.
- Tamanna niuertarfinni imerniartarfinnilu atuuppoq.
- Nunaqarfiit tassaapput Kuummiut, Isertoq, Tiilerilaaq, Sermiligaaq Kulusullu.
- Kalaallit Nunaata kangiani kimittuunik imigassaarniartoqanngilaq.
- Tasiilami nunaqarfiinilu Ittoqqortoormiinilu, aalakoornartutalinnik imigassanik 15 procentinit kimittunerusunik sassaalliineq tuniniaanerlu inerteqqutaavoq.
Tamanna illoqarfimmi nunaqarfiinilu ilungersunartumik ajornartorsiortoqarneranik pissuteqarpoq.
Tasiilami sapaatip akunnerata aallartinnerani akissarsisoqarlunilu utertoortoqarmat, inuit marluk imminut toqupput, inuit sisamat imminut toqunnissamut sioorasaaripput, angerlarsimaffinni 15-ini eqqissiviilliortoqarpoq ataaserlu pinngitsaalineqarluni.
- Imigassamik aalakoornartutalimmik peqquteqartumik, Tasiilami peqqinnissaqarfimmut ulluni kingullerni unitsitsinneqartut saaffiginnittullu imaaginnavipput, allaat napparsimmavik malinnaasinnaajunnaarluni, Kommuneqarfik Sermersooq allappoq.
Taamaattumillu imigassanik aalakoornartutalinnik tuniniaanerup unitsinneqarnissaa, kommunalbestyrelsimi ilaasortanut borgmesterimullu, Charlotte Ludvigsenimut, peqqinnissaqarfimmiit qinnutigineqarpoq. Qinnuteqaat Kalaallit Nunaata Politiivinit ilalerneqarpoq, tamannalu Naalakkersuisunit akuerineqarpoq.
Suliassiissutigineqartut tamarmik imigassartorsimanermik tunuliaqutaqartut
Kommunip upalungaarsimasui ulluni qaninnerni Tasiilaliassapput.
Tasiilami sapaatip akunnerata aallartinnerani eqqissiviilliortoqarnera, Tasiilami politiit ittuata, Aqqalu Petersenip uppernarsarpaa.
- Ullut marluk ingerlaneranni pinngitsaaliineq, nakuusernerit imminullu toqunnerit tamarmik imigassartorsimanermut attuumassuteqarput, taanna oqarpoq.
- Tasiilami inuit aalakoortut isumaginissaat, taakkulu kingorna suliarujussuit sulissutiginissaat 30-ata kingornali ulapputigilerpagut. Inuilli imigassartornerminnik imminut aqussinnaagunik pitsaanerpaassaaq. Angerlarsimaffimmi meerartaqaraanni imilernermi meeqqat ilaquttanut nalunngisanulluunniit paaritinneqarsinnaapput, taanna KNR-imut oqarpoq.
Politiinut unnerluutiginninnerit 49 procentinik qaffattut
Imigassartorsimatilluni pinerlunniartarneq takornartaanngilaq. Kalaallit Nunaanni nakuusersimasunik unnerluutiginnissutit ukioq kingulleq 49 procentinik qaffassimaneri naatsorsueqqissaarnermi erserpoq.
- Imigassartorsimanermut nakuusersimanermullu suliat ataqatigiilluinnartartut politiinit misilittagarineqarpoq. Nakuusersimanermut suliat amerlanersaat imigassartorsimanermi pisarput, taamaattumillu nakuuserniartarnerit amerlineri imigassallu eqqussat annertuneruneri imminnut ataqatigiisinnaanerat isumaqaqqajaanarsinnaavoq, politimesteri Bjørn Tegner Bay oqarpoq.
- Nakuusernerit amerlanersaat inuit ilisarisimasariit akornanni pilersaarutaanngitsumik tassanngaanartumillu pisarput. Angerlarsimaffinni pisarpoq, imigassartorpallaarsimanermilu pisarluni. Tassa ernguttoqartillugu pisarpoq.
- Imerniartarfiit matoreernerini angerlarsimaffimmi nanginnerit ingammik unammilligassaavoq. Taakkunani nakuusernerpassuaqartarpoq. Taamatut erngunnerni aamma pinngitsaaliinerpassuaqarpoq, Bjørn Tegner Bay oqarpoq.