Tasiilarmiut imminnut paarinissaminnik neriorsoqatigiittut
Tasiilami ulluni kingullerni pisut sakkortuut, tassani imminut toqunnerit ilaallutik pimmata, nunaqqataasoq, 36-inik ukiulik, Aron Kristiansen nunaqqatiminik aggersaavoq.
- Ippassaq illoqarfiup qeqqanut kaammattuivunga aqqarnup qeqqa naneruummik ikitsissalluta. Tassani immitsinnut paarinissamut neriorsoqatigiinnissaq siunertaavoq. Ulluni kingullerni pisut sakkortugamik, Aron Kristiansen KNR-mut oqarpoq.
Aaqqissuisoq inuit 30-it missaannik amerlatigisut illoqarfiup qeqqani peqataasut oqaluttuarpoq. Taakkua naneruutinik ikitsillutillu mobilimik qaammartuinik atuipput.
Kingulliunngitsoq
Pisoq alianaraluartoq iluaqutigineqarpoq.
- Annaasaqartut ilaat takkupput, soorunami alianarpoq, aliasupput aamma. Kisianni nukittorsaatigeqaat aaqqissuussaq aamma ilaasa iluareqaat isumassarsiara.
Aaqqissuusaq siulliuvoq. Aningaasarsisoqaleraangalli tamatigut pisarnissaa aaqqissuisup anguniarpaa.
- Pilersaarutigivara qaammatit tamaasa qaammammusisoqaleraangat, aningaasarsiffissaq aqagukkangat taamaaliortuaannalissasugut, immitsinnut paarinissamut neriorsoqatigiinneq siunertaralugu, taanna oqarpoq.
Taanna naapertorlugu aningaasarsiffissaq sioqqullugu inuit amerlanerusut aalakoornatik neriorsoqatigiinnermut takkussinnaapput.
