Immikkoortortami pisortaq imigassamik inerteqquteqarneq pillugu: Tasillami unikaallannissaq pisariaqartipparput
- Tasiilami pissutsit ernumanarput. Illoqarfimmi isumaginnittussaasugut aqukkuminaappagut.
Kommuneqarfik Sermersuup tunumi immikkoortortamut pisortaa, Hjørdis Viberg oqarpoq.
Taanna Tasiilami maanna sapaatini akunnerni marlunni septemberip ulluisa 17-iata tungaanut erngertumik atuutilersumik imigassamik inerteqquteqarfiulersumi sulisuuvoq.
Tasiilami nunaqarfiinilu ajornartorsiuteqangaatsiarnera pissutigalugu imigassamik inerteqquteqartoqalerpoq.
Suliaq naatsumik
- Tasiilami taasumalu nunaqarfigisaanni, ullumikkut tallimanngornermiit septembarip 17-iata tungaanut atuutilersumik, aalakoornartutalinnik imigassaarniarneq matuvoq.
- Tamanna niuertarfinni imerniartarfinnilu atuuppoq.
- Nunaqarfiit tassaapput Kuummiut, Isertoq, Tiilerilaaq, Sermiligaaq Kulusullu.
- Kalaallit Nunaata kangiani kimittuunik imigassaarniartoqanngilaq.
- Tasiilami taasumalu nunaqarfigisaanni Ittoqqortoormiinilu, aalakoornartutalinnik imigassanik 15 procentinit kimittunerusunik sassaalliineq tuniniaanerlu inerteqqutaavoq.
Tasiilami sapaatip akunnerata aallartinnerani akissarsisoqarlunilu utertoortoqarmat, inuit marluk imminut toqupput, inuit sisamat imminut toqunnissamut sioorasaaripput, angerlarsimaffinni 15-ini eqqissiviilliortoqarpoq ataaserlu pinngitsaalineqarluni.
AAMMA ATUARUK Efter voldtægt, vold og massivt druk: Salg af alkohol stopper i Tasiilaq
Taamaattumillu imigassanik aalakoornartutalinnik tuniniaanerup unitsinneqarnissaa, kommunalbestyrelsimi ilaasortanut borgmesterimullu, Charlotte Ludvigsenimut, peqqinnissaqarfimmiit qinnutigineqarpoq. Qinnuteqaat Kalaallit Nunaata Politiivinit ilalerneqarpoq, tamannalu Naalakkersuisunit akuerineqarpoq.
Imigassamummi attuumassuteqartumik Tasiilami napparsimmavimmut unittorpassuullutillu saaffiginnittorpassuupput, napparsimmavillu tamanna pissutigalugu angummassinnaajunnaartoq, Kommuneqarfik Sermersooq paasissutissiivoq.
- Imigassamik nioqquteqarnerup unitsinneqarnerani eqqissilluni sulisoqarnissaa anguniagaavoq. Aammali Tassilami eqqissisimasoqarnissaa illoqarfiullu meerartaasa inuusuttortaasalu eqqissisimatinneqarnissaat anguniagaalluni, taamaaliornikkut ingerlalluaqqilersinnaassaagut, Hjørdis Viberg oqarpoq.
Isumaginnittut ikiuigasuartussallu angalaartut
Taassuma pisiniarfiit baajanik viinninillu tunisisoqanngikkallarnissaa pillugu ippassaq nalunaaruteqarfigiartorpai.
Pisiniarfiit naliunaarut tigulluarpaat. Tamatumunngalu paasinnilluartoqarpoq, taanna oqarpoq.
- Imigassamik nioqquteqarnerup matuneqarnera piffissaq ungasinnerusoq eqqarsaatigalugu aaqqiissutaanngitsoq tamatta nalunngilarput. Unikaallatsitsineruinnarpoq. Unikaallatsitsinissarlu maannakkut pisariaqartipparput. Ullut sakkortupput.
Qanoq illoqarfimmi ikiuiniarpisi?
- Inunnik isumaginnittoqarfimmi immikkut sulisussanik upalungaarsimasunillu aqqusinermi takussaasussanik sulisussaqalersitsisoqarpoq. Inuusuttunut kulturikkullu illu inuusuttunut inissaqartitsinissaq pissutigalugu sapaatip akunnerata naanerani sivisunerusumik ammatinneqassaaq. Taavalu upalungaarsimasunik atuarfiup tarnip pissusianik ilisimannittuanik taperserneqartumik aallartitsisoqarluni, Hjørdis Viberg oqarpoq.
AAMMA ATUARUK Tasiilami akissarsiffiup utertoornerullu kingorna ajornartorsiuterpassuit
- Inuusuttunut kulturikkullu illu nutaajuvoq iluamillu suli ammarnani. Taanna ullumi ammarparput. Suli piariivinngikkaluarpoq, ullumikkut ammarneqarpoq inuusuttullu oqaloqateqariartorlutillu nerisinnaassapput. Taanna sapaatip akunnerata naanera tamaat ammassaaq.
- Aamma meeqqat inuusuttullu angerlarsimasinnaanngitsut unnuinissaat periarfissaassaaq, qimarnguillu ammassalluni. Isumaginninnermik susassaqarfimmi sulisut tamarmik sulisut – sulisut qulinit aqqaneq-marlunnut amerlassuseqartut nammineq kajumissutsiminnik suliaqartut peqatigalugit aqqusinermi angalaarput, Hjørdis Viberg oqarpoq.
- Kommunimi sapinngisatsinnik suliaqarpugut. Taamaakkaluartorli immikkoortortaqarfinni tamangajanni pinasuartumik suliaqarrappugut. Tamanna aamma pissutigalugu suliassaraluagut utaqqisittariaqarpagut. Tamannalu unammillernarpoq.
Sumiiffissamik amigaateqartoqartoq
Peqqissutsimut naalakkersuisoq, Kirsten Fencker Tasiilami pissutsit ilungersunarnerat pillugu ullumi ima oqarpoq:
- Kommunip ernumassuteqarnera Naalakkersuisut ilungersunartumik tiguaa, Naalakkersuisut piffissaq ungasinnerusoq eqqarsaatigalugu naleqquttunik suliniuteqarnermut suleqatiginninnissaminnut piareersimapput.
Pinasuartumik maannakkumullu kisimik atuuttussanik aaqqiissuteqarneruinnassanngitsut, Hjørdis Virbergn neriuuteqarpoq.
Taassumalu oqarnera naapertorlugu politiit, kommunit, peqqinnissaqarfik kommunillu qanimut maannakkut suleqatigiinnissaat pilersaarutaavoq.
- Ullumikkut angalallutik ikiuiartortartut Tasiilamukaraangamik isumaginninnikkut ikiuinerusarput. Pinasuartumillu ikiuunneq taanna iluaqutaanngilaq. Inuit artornartunik eqqarsaateqaraangamik inuunerminnik ajornartorsiuteqaraangamik tarnilukkaangamillu orniguffigisinnaasaannik peqassaaq.
