Naalakkersuisoq: Ineqarnermik aaqqissuusseqqinnissaq piareersarneqaleruttorpoq

Iluarsaassinissamut kinguartoorutit inoqarfinni takussaaqaat.

Namminersorlutik Oqartussat kommunillu iluarsaassinissamut kinguartoorutaat 3,7 milliardit koruunit 3,9 milliardit koruunillu akornanniipput. Aningaasaqarnermut Siunnersuisoqatigiit nalunaarusiaanni tamanna erserpoq. Taakku ineqarnermut poltikkimik aaqqissuusseqqeqqusisuupput.

Aaqqissuusseqqittoqaleruttortorlu, ineqarnermut naalakkersuisoq Erik Jensen (Siumut) oqarpoq:

- Ineqarnermik annertuumik aaqqissuusseqqileruttorpugut. Ingerlalluarporlu, taanna KNR-imut oqarpoq.

Namminersorlutik Oqartussat nunatsinni inissiaataasa 6000-t missaanniittut ilarpassui aserfallassimagamik nutartigassaapput.

Inissiat 106-it inoqanngitsut

Namminersorlutik Oqartussat Nuummi inissaaleqiffioqisumi inissiaataani 106-it inoqanngitsut, KNR sapaatit akunnerata siuliani allappoq.

Inissiat taakku aserfallassimaqigamik oqoqarlutilluunniit najugaqarfigineqarsinnaanngillat. Taakku agguaqatigiisillugu ukioq ataaseq qaammatinilu arfinilinni najugaqarfigineqartanngimmata ineqarnermut akiliutitigut ukiumut 4,5 millionit koruunit missaannik annaasaqaataasarpoq.

Inissiat taakku aserfallassimanerat ineqarnermik aaqqissuusseqqittoqartariaqarneranik ersersitsisuusut, Erik Jensen oqarpoq.

- Nunatsinni tamarmi, Nuummiinnaanngitsoq, ajornartorsiutaaqaaq. Tamannalu akuerineqarsinnaanngimmat,  kommuninut partiinullu allanut oqaloqatiginnissutigerusutatsinnik anguniagaqarput, Erik Jensen oqarpoq.

AAMMA ATUARUK Inissiat inoqanngitsut nivinngaanikkut neqeroorutigineqartalissapput

Ineqarnermilli aaqqissuusseqqinneq sunik ilaqassanersoq, Erik Jensenip KNR-imut oqaatigisinnaanngikkallarpaa. 

Imali oqarpoq:

- Naalakkersuisut ineqarnermut akiliutinik aappaagu qaffaanialersaanngitsut nalunngilara, taanna oqarpoq. 

Danskit naalagaaffiat akiliisuusariaqartoq

Danmark nutarterujussuarnermi akiliisuusariaqartoq, Erik Jensen KNR-imut ukioq manna siusinnerusukkut oqarpoq.

- Ajornartorsiut Namminersorlutik Oqartussat kommunillu suleqatigiinnerisigut aaqqissinnaavarput, taamaalioreerutta danskit naalagaaffiat akileeqataaqqusinnaavarput, Erik Jensen oqarpoq.

Taassuma allaffia Nuup ilaani Narsarsuarmi inissiarsuarnut isikkiveqarpoq, inissiarsuillu taakku naalagaaffiup akileeqataanissaanik siunnersuutiminut tunngavilersuutigai.

Inissiarsuit taakku danskit naalagaaffiata nunaqarfinnik illoqarfinnillu inuerusaanermi taakkunaneersunik Nuummut pinngitsaaliissummik nuutsitsinissamut nunatsinni 1960-ikkut 1970-ikkullu akornanni inissiarsualiaata ilagaat. Inissiarsuillu taakku maanna aserfallassimapput. 

Ineqarnermut oqartussaaffik nunatta 1987-imi tiguaa – danskit naalagaaffiat iluarsaassinissamut kinguartoorutinik sooq akileeqataasariaqarsoraajuk?

Erik Jensen ima akivoq: 

- Pisut tulleriiaanneri iImaaliallaannaq nassuiarsinnaanngilakka, taakkununngali tunuliaqutaasut nassuiarsinnaavakka. Taakkulu partiinut allanut aamma oqaloqatiginnissutigerusuppakka. Pisullu tulleriiaarneri iluarsaassinissamut kinguartooruteqarujussuarnerput aaqqiinissamut tunuliaqutaapput, Erik Jensen oqarpoq. 

AAMMA ATUARUK Renoveringsefterslæbet er vokset til 2,3 milliarder kroner

Siunnersuutini danskit ineqarnermut ministeriatalu oqaloqatigiissutigisimagitsik, taanna ilisimatitsivoq, sorpiaalli oqaloqatigiissutigisimaneritik oqaatiginngilaa.

Ineqarnermik aaqqissuusseqqinneq aningaasanut inatsisip isumaqatigiinniutigineqarnerani ilaavoq.

Iluarsaassinissamut kinguartoorutit ullormut 500.000 koruuninik amerlisartut, ineqarnermut siusinnerusukkut naalakkersuisoq Naaja Nathanielsen KNR-imut siorna oqarpoq.