KAK-p aningaasaqarnerup ilungersunarnera pissutigalugu pilersaarutit amerlanerusut taamaatikkai

Kalaallit Arsaattartut Kattuffiata aningaasaqarnerata ilungersunarnera pissutigalugu pilersaarutit taamaatiinnarneqartariaqarneranik kinguneqarpoq.

Nordic Baltic Cup 2024 taakkununnga ilaavoq. Kattuffik ukioq manna aaqqissuussisuusussaagaluarpoq, taamaatitsiinnartariaqarsimavorli, aningaasaqarnerlu maanna ajutoortitseqqippoq.

Kattuffiup arnat nunanut allanut unammisartut katersuunnissaat, angutit U19-it futsalertartut katersuunnissaat angutillu nunanut allanut unammisartut Kroatiami Futsal Weekimi unamminissaat taamaatiinnartariaqarsimallugit facebookikkut saqqummiuppaa.

Kattuffiup tamanna uggornartoq allakkamini isertuutinngilaa, periarfissalli allat tamarmik misissorneqarsimagaluartut oqaatigaa.

KAK-p allattoqarfiani pisortap, Ungaaq Abelsenip apersorneqarnermini tamanna erseqqissaatigaa.

- Unitsitsisimanerput kingullerpaatut aatsaat periarfissaasimavoq, allanik periarfissanik ujartuigaluaqaagut, ilami piviusunngortitserusukkaluarnermik. Kisianni ajoraluartumik inissisimanerput taamaatsillugu unitsitsisariaqarsimavugut, taanna KNR-imut oqarpoq.

Tamannali kattuffimmut pisariaqarsimavoq.

Taamaatitsinerit aaqqiissutaassasut

- Aningaasat kisitsisaat taanngikkaluarlugit, kisianni aaqqissuussinissaagaluit pingasut nalingi unitsittariaqaratsigit, aningaasat equngasortaat iluarsissagutsigit, Ungaaq Abelsen oqarpoq.

Aningaasaqarnerliorneq kattuffiup maanna ilungersuassutigisaa ukiuni siuliaani aningaasaqarnerup equngasimanerata kinguneriaa, KAK Facebookikkut allappoq.

- Timmisartumullu akit missingersuutigineqartumit naatsorsuutigineqartumiillu ukioq manna qaffasinnerusimanerat aamma pissutaaqataavoq, Ungaaq Abelsen oqarpoq.

Aappaaguli katerissinnaassappat?

Neriuutissaqartorli, Ungaaq Abelsen erseqqissaavoq.

- Oqarsinnaavugut 2025-minngaanniit qanorluunniit piviusunngortitsissaagut.

Taassuma KAK-p taama pisoqaqqinnginnissaa sulissutigigaa erseqqissaatigaa.