Nunatsinni nunanit tamalaanit futsalertoqarnissaanut aningaasatigut ajornartoortoqartoq

Nordic Baltic Cup Nuummi oktobarip aallartinnerani aaqqissuunneqartussaagaluarpoq. Aaqqissuussinissamulli aningaasat naammannginnerat pissutigalugu tamanna taamaatinneqarpoq.

Allattoq Kim Hinrichsen

juulip 19-at 2024 13:26

Kalaallit Arsaattartut Kattufiata Nordic Baltic Cup 2024-mi aaqqissuussisuusussanngornini tulluusimaarutigalugu januaarimi oqaatigaa.

Maannali – Nuummi aaqqissuussinissamut qaammatit pingasungajaannanngortut pilersaarutit taamaatiinnarneqarput.

Pissutaasorlu uggornartumik aningaasanik pissuteqarpoq. Naammattunik aningaasassarsiniarneq iluatsinngilaq, taamaammallu ukioq manna Nordic Baltic Cup-ertoqassanngilaq.

Aamma atuarukNunat tamalaat futsalimi unammersuarneranni Nunarput aaqqissuisuujumavoq

KAK-illi nunatsinni nunanit tamalaanit futsalimik unammiartortoqarnissaanut takorluugaqaannarpoq. Kattuffiup nunatsinni 2025-mi 2026-miluunniit unammisaqattaartoqarnissaa sulissutigiinnassallugu oqaatigaa.

KAK-ip siulittaasua, Kenneth Kleist soorunami ugguarpoq, kisianni nunanit tamalaanit nunatsinni unammisoqartussaarpasikkaluarnera aamma tulluusimaarutigaa:

- Nunat allat Kalaallit Nunaannut peqataarusuttut tulluusimaarutigaagut, neriuppugullu tulliani unammiuaartitsinissarput iluatsippat aamma taakku piareersimajumaartut, Kenneth Kleist oqarpoq, nangillunilu:

- Suliffeqarfiit namminersortut pisortallu assigiinngitsut suliniummut timersornermut nunatsinnullu iluaqutaasumut tapersersuisut qujamasuutigeqaagut.

Aamma atuaruk Oqaluttuarisaanermut ilannguttut: Arnat futsalertartut siullerpaamik nunanut allanut unammilersut

Nunatsinni unammisoqartussaajunnaarnera kalaallit angutit nunanut allanut unammisartut nunanit allanit unammisartunut ukiaru unamminerannik isiginnaannginnissamik tamanna isumaqanngilaq.

Angutimmi futsalimi nunanut allanut unammisartut Futsal Week Croatiami septembarimi unammiuaaqataassapput.

Nutaarsiassami kukkunermik nassaarsimaguit uunga allaffigineqarsinnaavugut.