Oqaluttuarisaanermut ilannguttut: Arnat futsalertartut siullerpaamik nunanut allanut unammilersut
Futsalimi arnani nunanut allanut unammisartuni sungiusaasoq David Bror Janussen Nunatsinni pissartanngorniunneq Ilulissani pereersoq unammisartunik 16-inik toqqaavoq.
Taakku oqaluttuarisaanermut ilannguttumik juunip aallartilaarnerani Kroatialiassapput arnani kalaallini siullersaallutik pisortatigoortumik futsalimut nunanut allanut unammissagamik. Siornatigut sungiusariaannarlutik arnat, pisortatigoortumik nunanut allanut unamminertaqanngitsumik, Danmarkimut angalanikuupput.
Maanna unammiuaarneq Futsal Week peqataaffigissavaat. Unammiuaartarneq taanna kalaallit angutit peqataaffigisariigaat nunanut allanut unammisartut unammiuaartarfigivaat.
- Una unammiartorluni angalanitta siullersarissavaat. Tassani takusinnaalerumaarparput nunanut allanut sanilliulluta sumi inissisimanerluta, futsalimi arnat nunanut allanut sungiusaasuat David Bror Janussen KNR-mut oqarpoq.
Unammisat sakkortuut
Futsalmi arnat pissartanngorniunnerat Ilulissani apriilimi pivoq peqatigiiffiit arfineq-pingasut peqataasoralugit.
- Unammersuarnerni arsaatillaqqissorpassuit takuagut. Arlaqarput ajoquseqqalaartut peqataanissamut assut periarfissikkusussimasaraluavut, David Bror Janussen oqarpoq.
- Kisianni tassa Danmarkimut tassanngaanniillu Kroatiamut angalanissatsinnut atit siusissukkut tunniunneqartussaagamik. Taamaattumik unammiartoqataasussanik siusissukkut toqqaavugut, David Bror Janussen oqarpoq.
Arnat nunanut allanut unammisartut unammiuaarnissaat Futsal Week juunip aqqarnaniit 16-iata tungaanut pissaaq Nunatsinniillu unammiartortut juunip aallartilaarnerani Danmarkiliarlutik aallassapput.
Nunat allat peqataasussat tassaapput: Kroatia, Finland, Marokko aamma Italia.
- Nunat allat videomi isiginnaallattaalerpakka. Finland sakkortullunilu siuarsimaqaaq nunallu allat misilittagaqarluarlutik, David Bror Janussen oqarpoq.
- Oqareernittut siullerpaamik aatsaat unammiartulerpugut pissanganarporlu takussallugu nunanut allanut sanilliulluta sumi inissisimanersugut, David Bror Janussen naggasiivoq.
