Nunat tamalaat futsalimi unammersuarneranni Nunarput aaqqissuisuujumavoq
Kalaallit arsaattartut kattuffiata KAK-p maanna sulissutigaa futsalimi unammersuarnerup Nordic Baltic Cupip Nunatsinni pinissaa sulilu annertusillugu Tysklandip peqataatinnissaa.
Futsalimi unammersuartarneq Nordic Cup kalaallit ukiut arlallit peqataaffigisagaat annertusillugu nunat baltiskiusut ilanngunneqarput.
- Nordic Baltic Cupimi decembarimi najuuppunga tassanilu peqataasullu isumaqatigiissutigaarput 2024-mi Nuummi Nordic Balticupeqarnissaanut qaaqqusissutinik nassiussissasugut, KAK-mi siulittaasoq Kenneth Kleist KNR-mut oqarpoq.
Nordic Baltic Cup ukiut arlallit decembarimi pisarpoq piffissarlu unammiffiusartoq ukioq manna allanngortinneqassannguatsiarpoq.
- Unammisitsineq decembarimi pisinnaanngilaq nunat arlallit piffissami tassani VM-mi unammersuaqataasussaammata. Taamaattumik maanna ilimanartorujussuuvoq unammisitsineq oktobarip aallaqqaataaniit pissasoq, Kenneth Kleistip oqaatsini ilavai.
Danmarkimut akiniaaneq
Nordic Baltic Cupimi peqataanermini Nunatsinni unammisitsinissamik eqqarsaammik saqqummiussivoq
Nunat qaaqquneqartut tassaapput Danmark, Norge, Sverige, Finland, Estland, Letland, Litauen aamma Tyskland.
- Taakku eqqarsarnartoqartitsilaarput, nunat qaaqquneqartut qisuariaataat pillugit Kenneth Kleist oqarpoq.
- Nalunngilarput Nunatta Danmarkillu akornanni angalaniarneq qanoq akisutigisoq. Nunat arlallit eqqarsarnartoqartitsinerminnut angalanermut aningaasartuutit pissutaasutut taakkartorpaat. Uagut isumaqatigiippugut misissueqataaffiginiarlugu aningaasartuutit qanoq apparsarneqarsinnaanersut, Kenneth Kleist oqarpoq.
Qallunaat peqataaffigisaannik futsalimi unammisitserusunnermi timersornikkut aamma tunngavilersuutissaqarpoq.
- Nammineq arsaaffitsinni takutitserusuppugut. Aamma Danmarkimut decembarimi ajorsareerluta akiniaarusuttorujussuuvugut, Kenneth Kleist oqarpoq.
Nunat qaaqquneqartut akissutissaat maanna utaqqineqarpoq Nunatsinni futsalimi unammisitsinerit annersarisinnaasaata piviusunngornissaata utaqqinerani.
