EU-mi nunat gas-imik Ruslandimeersumik pilersugaajunnaarnissartik ataasinngornermi akuersissutigissagaat

EU-mi nunat gas-imik Ruslandimeersumik atuiunnaarnissamut ataasinngornermi aalajangerumaarput.

Tamanna silap pissusia nukissiornerlu pillugit ministerip Lars Aagaardip (M) naatsorsuutigaa.

Ministerit Luxembourgimi ataatsimiinnissaat sioqqullugu tamanna nalunaarutigineqarpoq, tassanilu aalajangiisoqarnissaa naatsorsuutigineqarpoq.

- Amerlanerussuteqartut akuersinissaat naatsorsuutigaara. Taamaattorli soorunami ministerit isumaat tusarusuppakka, Lars Aagaard oqarpoq.

Amerlanerussuteqarluinnartunit aalajangiisoqarsinnaavoq, taamaalillunilu nunat qulartut soorlu Ungarn aamma Slovakia, EU-mi ilaasortaasut allat amerlanerussuteqarlutik tapersersuippata, qulartut itigartitsisinnaanngillat.

Aalajangiineq amerlanerussuteqartunit tapersersorneqassappat,  EU-mi nunat Ruslandip Ukrainemut sorsunneranut aningaasanik pissarsisarunnaarnissaanut alloriarnerujussuussasoq, Lars Aagaard isumaqarpoq.

- Russit nukissiuutaannit pinngitsuuisinnaajunnaarnersimanerup unitsinnissaa pineqarmat,  EU-mut kiffaanngissuseqalersitsinertut taavara, taanna oqarpoq.

Ukiortaaq sioqqullugu isumaqatigiinniarnerit naammassineqassasut

Danskit EU-mi siulittaasuunerat pissutigalugu ataasinngornermi ataatsimiinnermi aqutsisuussaaq. Taamaalillunilu aalajangiineq qallunaat EU-mi siulittaasuuneranni angusat maluginiarnarnerpaat ilagisinnaavaat.

Nunat EU-mi ilaasortaasut isumaqatigiissummik akuersinerisa kingorna qallunaat EU-mi siulittaasoqarfimmiittut EU-p inatsisartuinik isumaqatiginninniarfiginnipallanniarput.

- Ukioq nutaaq sioqqullugu isumaqatigiinniarnerit naammassinissaat anguniagaraarput, taamaalillutalu EU-mi Ataatsimiititaliarsuup siunnersuutaani ullut aalajangersagaasut eqqortissinnaavavut, Lars Aagaard oqarpoq.

EU-p Ataatsimiititaliarsuata siunnersuutaani siullermi piffissami sivikitsumi isumaqatigiissutit 2026-mi atorunnaarsinneqartussatut siunniunneqarput, piffissamilu sivisuumi isumaqatigiissutit januaarip aallaqqaataani 2028-mi tamakkiisumik atorunnaarsinneqarnissaat siunniunneqarlutik.

USA-p præsidentiata Donald Trumpip Ruslandi tatiniarlugu russit nukissiuutaanik EU-p pisisarunnaarnissaanik piumasaqarnerata kingorna, EU-mi Ataatsimiititaliarsuup atorunnaarsitsinissaq januaarip aallaqqaataani 2027-mut siuartippaa.

/ritzau/