Louvre Parisimiittoq minutsit arfineq-marluk ingerlanerinnaani tillinniarfigineqartoq
Nunarsuarmi tusaamasarsuaq eqqumiitsulianik katersugaasivik Louvre, fraskit illoqarfiisa pingaarnersaaniittoq Parisimiittoq tillinniarfigineqarsimavoq.
Taama frankrigimi piorsarsimassutsikkut ministeri Rachida Dati, inuit attaveqaqatigiittarfiatigut X-kkut allappoq.
Peqquteqavissumik katersugaasivik sapaatip ulluata sinnerani matuvoq, taama imalimmik Facebookkikkut allattoqarpoq.
Frankrigip naalagaaffimmi pissutsinut ministeria Laurent Nuñezip, kusanartut taarserneqarsinnaanngitsut tillinneqarsimasut, Frankrigimi nutaarsiassaqartitsivinnut France Inter, France Info aamma Le Mondemut uppernarsarpaa.
Nuñezip oqarnera naapertorlugu tillinniarneq minutsini arfineq-marlunni pisimavoq.
Nutaarsiassaqartitsivik AFP-mut, tillinniat marluunngikkunik pingsaasut ilanngullugu oqaatigaa. Katersugaasivimmi init ilaat Galleri d'Apollonimi saqqummersinneqartut ukkatarineqarsimapput.
Franskit naalagaaffimmi pissutsinut ministeriaqarfianit, tillinniarfiusoq misissuiffigineqaleruttortoq, nutaarsiassaqartitsivimmut Reutersimut allapput.
Suut qassillu tillinneqarsimanersut misissorneqaleruttorput.
- Kusanarlutik taarserneqarsinnaanngitsutut kisiat naleqanngillat, piorsarsimassutsikkummi oqaluttuarisaanermilu aamma naleqarput, Frankit naalagaaffimmi pissutsinut ministeriaqarfiat allappoq.
Tillinniat scooterinik apuuttut
Franskit nutaarsiasssaqartitsiviani AFP-mi ilanngutassiortut ilaasa, inuit atersineqanngitsut naapippai, taakkulu tillinniartunik naammattuuinerminni, tillinniartut pilattuutinik sarfatortunik sakkoqarlutik sapaammi tillinniartut takusimallugit oqaluttuarput.
Scooterinik apuupput, AFP allappoq.
Napoleonip katersai nalingi ilisimaneqanngittsut tillinneqartut, franskit nutaarsiassaqartitsivii allapput.
"Mona Lisa" Leonardo da Vincimit qalipanneqartoq ilaatigut Louvremiimmat katersugaasivik tusaamasarsuuvoq. Inunnit 9 millioninit ikinnerunngitsunit siorna orninneqarsimasoq, AFP allappoq.
Katersugaasivik 73.000 kvadratmeterinik aggulunneqarpoq, ilaqutariit kunngikkormiuusut illussaarsuassaattut 1546-mi sananeqarpoq.
Kunngikkormiulli Versaillesimut nuullutik 1682-mi iserterput, kunngikkormiunullu eqqumiitsuliat Louvremiisinneqalerput, kingornalu pisortatigoortumik naalagaaffiup katersugaasivinngorluni 1793-mi ammarpoq.
