Angallassinermi kiffartuussinermut isumaqatigiissutit inissittut

Kiffartuussinissamut isumaqatigiissutit inissipput.

Air Greenland, Disko Line, Nordlandair Arctic Umiaq Linelu isumaqatigiissuteqarfigineqarput - ingerlatseqatigiillu taakku ilaasartunik angallassisartooreerput.

Ingerlatseqatigiiffiit nunatta iluani timmisartuussinermi imaatigullu angallassinermik aappaagumut ukiullu tulliinut qulinut maanna ingerlatsiinnartussanngorput, Ineqarnermut attaveqaqatigiinnermullu naalakkersuisoq, Karl Frederik Danielsen oqarpoq.

AAMMA ATUARUK Ilinniarnertuunngorniaq juullisioreeruni utersinnaanngitsoq

- Anguniagaq aallaqqaammulli ersarippoq – innuttaasunut angallanneq pitsaanerusoq. Naalakkersuisut piffissami sivisuumi isumaqatigiissusiassanut taakkununnga isumassarsiorlutik pimoorussiviusumik katersuisimapput.

- Suliaq sivisusimavoq, aammalu siunissamut ungasissumut angallannermut politikkikkut siunnerfeqartumik kusanartumik angusaqarnissaq iluatsikkatsigu tulluusimaarpunga.

Ukiunut qulinut isumaqatigiissutit

Kiffartuussinermut isumaqatigiissutit ukiuni qulini atuutissasut Karl Frederik Danielsenip oktobarip naanerani oqaatigaa.

Isumaqatigiissuteqarnermi ”akit pitsaassuserlu eqqarsaatigalugit” kiffartuussinermut isumaqatigiissuteqarnerit ukiuni qulini atuuttussanngortinneqartut Karl Frederik Danielsenip oqaatigaa.

- Isumaqatigiissutit ukiuni qulini atuuttussat atorlugit siunissami ungasissumi angallannikkut politikkip, inuussutissarsiornermik patajaatsitseqataasussap attanneqarsinnaanissaa Naalakkersuisunit kissaatigineqarpoq, naalakkersuisoq, Karl Frederik Danielsen oqarpoq.

AAMMA ATUARUK Servicekontrakterne udløber: Oppositionen er utålmodig

- Tamanna aqqutigalugu inuussutissarsiortut siunissamut ungasissumut pilersaarusiorsinnaanissaat aningaasaliisinnaanissaallu qulakkiissavarput – minnerunngitsumik takornariaqarneq eqqarsaatigalugu. Nunatsinni nunaqarfiit isorliunerusullu innuttaasunit, takornarianit inuussutissarsiortunillu tamanit tikikkuminartuunissaat Naalakkersuisunit kissaatigineqarpoq – ukioq kaajallallugu. Kiffartuussinermut isumaqatigiissutini tamannarpiaq ersersinneqarpoq taperserneqarlunilu.

Kiffartuussinermut isumaqatigiissutit ukiut qulit ingerlaneranni Naalakkersuisunut 1,7 milliardit koruuninik aningaasartuutaassapput.

Air Greenland iluanaaruteqarnerpaassaaq. Namminersorlutik Oqartussat pigisaa, timmisartuussileqatigiiffk ukiut qulit ingerlanerani 1,4 milliardit koruuninnassaaq.

Disko Line 237,6 millionit koruuninngassaaq. Arctic Umiaq Line 77,2 millionit koruuninnassaaq. Nordlandairilu 25,4 millioninnassalluni.

Naalakkersuisut oqarnerat naapertorlugu angalasunik angallassinermi atatillugu uku pitsanngorsarneqassapput:

• 1. januar 2021 aallarnerfigalugu nunatsinni qulimiguulinnik assartuussinerit tamarmik Air Greenlandimit tiguneqassapput. Tamatuma kingunerisaanik silaannakkut assartuussinermut bilitsinik ataqatigiissunik Air Greenlandimut pisisoqarsinnaalissaaq.
• Air Greenland qulimiguulinnik Airbus H155-inik, Bell 212-inut taartissanik nutaaliaasunik pisissaaq.
• Qeqertarsuup Tunuani, Kalaallit Nunaata qeqqani aamma Kalaallit Nutaata kujataani imaatigut angallassineq suli Disko Line-mit isumagineqassaaq, aammalu najukkani sullissisuutitanit amerlasuunit, ullumikkut suliassanik isumaginnittuusunit isumagineqassalluni. Bilitsit suli Disko Line-mit pisiarineqarsinnaassapput.
• Kalaallit Nunaata kujataani angallatit sikusiutit sukkasuuliat nutaat, 36-nik ilaasoqarsinnaasut atorneqalissapput – taakku hybrid-iunissaat ilimanarpoq. Taamaalilluni nunap immikkoortuani isumannaassuseq, ilorrisimaarsinnaaneq pisinnaasallu annertusissapput.
• Targa sila ajortinnagu angalasartussaq Nanortalimmut aalajangersimasumik inissinneqassaaq.
• Norlandair-ip Nerlerit Inaannut timmisartuussisarnera Nerlerit Inaata aamma Reykjavik-ip akornanni qaammammut marloriarluni toqqaannartumik attaviliinikkut pitsannguiffigineqassaaq, tamatumalu kingunerisaanik Islandimut unittarnerit ikilissapput, kiisalu Kulusuup aamma Nerlerit Inaata akornanni attartorluni timmisartuussisoqarsinnaalissaaq.
• Distriktini kiffartuussinermik isumaqatigiissuteqarfiusuni nunap immikkoortuani mittarfinnik sanaartornerit ilutigalugit isumaqatiginninniaqqinnissamut periarfissat tamakkiisumik eqaassuseqalissapput.
• Bilitsit, allakkat nassiussallu ullumikkut akiinut naleqqiullugit qaffaasoqassanngilaq – taamaattorli aningaasat nalingisa nikerarneri akillu ineriartorneri malillugit ingerlaavartumik iluarsiisoqartassaaq.
• Bilitsinut annaasanut qulakkeerinissaq, kiisalu inissinneqarnerup nerisaqarnerullu sullissisunit akilerneqartarnissaat, taakkulu siunissami angalasut sumiluunniit najugaqaraluarpata atuutsinneqalissapput.
• Kangerluk Qeqertarsuarmi inissisimasoq siullermeerluni kiffartuussinermut isumaqatigiissuteqarfiusunut ilanngunneqarpoq, piffissamilu imaatigut angallaviusumi tassanngaanniit qaammammut marloriarlunilu aallartoqartassaaq. Kiisalu ukiuunerani attartornermut piumasaqaatit atorlugit qaammammut marloriarluni qulimiguulimmik assartuussisoqartassaaq.
• Qeqertat nunaqarfittut inissinneqassappat ilanngunneqassaaq.

Ataatsimiititaliap siunnersuut akuerigaa

Inatsisartut aningaasaqarnermut akileraartarnermullu ataatsimiititaliaata Air Greenlandimut, Disko Lineut, Norlandairimut Arctic Umiaq Linemullu angallassinissamut allanillu assartuinissamut isumaqatigiissutissatut siunnersuut tallimanngornermi akueraaa. Siumumit, Demokraatinit, Nunatta Qitornaaniillu sinniisut isumaqatigiissutinik akuersisuupput.

Illuatungiliuttut siunnersuummut itigartitsipput.

- Suliap  nukinginnar-tuunera pissutigalugu  ataatsimiititaliami  amerlanerussuteqartut  aalajangiinerat,  allakkiamik allamik  ikinnerussuteqartut  oqaaseqaataannik  imaqartumik  malitseqartussaq,  matumuuna kisimi nalunaarutigineqarpoq, ataatsimiititaliap kiffartuussinissamut isumaqatigiissutit pillugit aalajangiinermi oqaaseqaataani allassimavoq.