- Juullisioriareerlutik angerlartussaagaluit angalanissartik qulakkeersinnaanngilaat, Pele Broberg oqarpoq.Assi: KNR

Isumaqatigiissutit atorunnaalersut: Illuatungiliuttut utaqqikatattut

Nunatsinni sumiiffiit ilaanni ilaasunut assartuinermullu kiffartuussinissamut isumaqatigiissutit ukioq naappat atorunnaassapput.

Sumiiffiit ilaanni ukiumi nutaami angalaniaruit angalanissamut billetimik suli pisisinnaanngilatit, isumaqatigiissutimmi maanna atuuttut ukiup naanerani atorunnaarpata allanik suli taartissaqanngillat.

Attaveqarnermut naalakkersuisup isumaqatigiissutissanik nutaanik atsiugaqarsimanerluni suli nalunaarutiginngilaa. Tamanna illua-tungiliuttut naammagisimaanngeqaat.

AAMMA ATUARUK Kiffartuussinermut isumaqatigiissut assuarineqartoq angalasoqarnerutitsisoq

- Killiffippiaq aammalu isumaqatigiissut qanoq ittorpiaq Naalakkersuisut isumaqatigiissutiginiarneraat ilisimanngilarput, Inuit Ataqatigiit siulittaasuat, Múte Bourup Egede KNR-imut oqarpoq.

Isumaqatigiissut qaammat ataaseq ullullu 14-it missaat qaangiuppata atorunnaassaaq. Ukiortaamiit qanoq iliortoqarniarnersoq Partii Naleqqamiit aamma suli ilisimanngilaat, tamannalu iluarinngeqaat.

- Taanna qanorluunniit qiviaraluaraanni akuersaarneqarsinnaanngilaq. Utimut qiviaraanni kukkussutaasimasut ilikkagaqarfigisimanngilaat, Pele Broberg KNR-imut oqarpoq.

Ilaasunik angallassinermut kiffartuussinissamut 2017-imiit 2020-ip naaneranut isumaqatigiissutit Naalakkersuisut isumaqatigiissuteqarfigisaasalu 2016-imi septembarip 13-anni naammassivaat.

Naalakkersuisut isumaqatigissuteqarfigisaat tassaapput: Air Greenland, Disko Line aamma Norlandair.

Ataatsimiititaliaq oqaaseqarsinnaanngitsoq

Aningaasaqarnermut akileraartarnermullu ataatsimiititaliap attaveqarnermut naalakkersuisoq ukioq manna februaarip 27-ani ukiunut qulinut atuuttussamik isumaqatigiinniarsinnaanissaanut piginnaatitsissummik tunivaat. Isumaqatigiissutilli naalakkersuisup ataatsimiititaliamut apuuteqqaartinnagit atsiorsinnaanngikkai, ataatsimiititaliap siulittaasua, Siumumeersoq Hermann Berthelsen KNR-imut oqarpoq.

- Ilaasunut assartuinermullu kiffartuussinissamut isumaqatigiissutit isumaqatigiinniutaaneranni ataatsimiititaliamiit oqaaseqarsinnaanngikkallarpunga, Hermann Berthelsen oqarpoq.

KNR-ip attaveqarnermut naalakkersuisoq Karl Frederik Danielsen oqaaseqartinniarlugu saaffigisaraluarpaa iluatsissanaguli. Sapaatilli akunnerata matuma ingerlanerani pisoq pillugu oqaaseqarumaartoq, naalakkersuisoqarfia neriorsuivoq.  

Kiffartuussinissamut isumaqatigiissuteqarnermi pitsaassuseq aallaavigineqartassasoq, unammilleqatigiinnerlu anginerusoq pilersikkumallugu kisermaassisussaatitaaneq naapertuuttunngorsarneqassasoq, Naalakkersuisoqatigiit isumaqatigiissutaanni allaqqavoq.

Angerlarnissaq qulakkeerneqarsinnaanngitsoq

Sumiiffiit ilaanni ukiumi nutaami angalanissamut billetit pisiarineqarsinnaanngillat. Tamanna angalanissap piviusunngortinniarneranut aporfiusoq Partii Naleqqamiit Inatsisartunut ilaasortaq isumaqarpoq.

- Juullisioriareerlutik angerlartussaagaluit angalanissartik qulakkeersinnaanngilaat, Pele Broberg oqarpoq.

AAMMA ATUARUK Kiffartuussinissamik isumaqatigiissutit kiisami inissipput

Tamanna toqqissisimajunnaarnermik kinguneqarmat kiffartuussinissamut isumaqatigiissutissat naammassineqartariaqalertut Inuit Ataqatigiinniit isumaqarput.

- Piaartumik saqqummiunneqartariaqarput, Innuttaasunik utaqqititsineq toqqissisimaffiunnginnermik pilersitsiviusoq isumaqarpugut, Múte Bourup Egede oqarpoq.

Diskoline Qeqertarsuup Tunuani nunattalu kujataani imaatigut qulimiguullillu atorlugit ilaasunik angallassisarpoq. Ukiortaamiit Qaqortuminngaanniit Narsarsualiassaguit imaluunniit Ilulissaniit Qeqertarsuarmut billetimik maanna pisisinnaanngilatit. 

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat