Kiffartuussinissamik isumaqatigiissutit kiisami inissipput
Kiffartuussinissamut isumaqatigiissutit kiisami inissipput. Air Greenlandimi Namminersorlutillu Oqartussat atsiorsimalerput.
Taamaalilluni ukiortaamiit angalanissamut inniminneerusuttut Air Greenlandimi ullumikkut pisisinnaalissapput.
Sumiiffiit pineqartut tassaapput: Qaanaap, Upernaviup Uummannap Tasiilallu eqqaani nunaqarfinnut qulimiguulimmik angallassinerit. Qaanaamullu timmisartuussinerit. Tamatuma saniatigut Qaarsuniit Kulusummiillu qulimiguulimmik timmisartuussinerit.
- Inissitassat kingulliit inissimmata nuannaarutigisorujussuuara, taamaalillunilu ukiut tulliuttut ataatsimut isigalugit, minnerunngitsumillu juullimut atatillugu angallannissaq immikkut eqqarsaatigalugu angallannissat toqqissisimasumik ingerlanneqarsinnaalerput. Periarfissaq manna iluatsillugu sullissisut tamaasa suliap pitsaalluinnartumik, torersumik pilersitsiviulluartumillu ingerlanneqarsimanera pillugu qutsavigerusuppakka.
Kiffartuussinissamut isumaqatigiissutinut tapiliussatut isumaqatigiissutit kingulliit, ulluni sapaatillu akunnerini qaninnerni piareerneqarnissaat naatosorsuutigineqartoq, attaveqaqatigiinnermut naalakkersuisoqarfik paasissutissiivoq. Kinguaattoornermi inissinneqartarnissamut, nerisaqartinneqartarnissamut, billetsillu kinguaattoornermi annaasat taarseqartarnissaannut aaqqiissutissat aamma ilisimatitsissutigineqarumaarput.
Tapiliussatut isumaqatigiissutit ilaat inissinneqareerput. Kujataani innuttaasut ukiuunerani qulimiguulimmik angallanneqarnissamut isumalluutaat amerlanerusut neqeroorutigineqarsinnaalerput. Martha Lund Olsenilu naaperlugu Nanortalimmi angallannermut kiffartuussinerit annertuumik kivitsigineqartussaapput.
