Ilinniarnertuunngorniaq juullisioreeruni utersinnaanngitsoq
Angallassinermut kiffartuussinissamut isumaqatigiissutit maanna atuuttut 2020-ip naanerani atorunnaassapput, Naalakkersuisullu isumaqatigiissutissamik suli qulakkeerinninngillat.
Taamaatsillugu Sermiligaarmiu Qaqortumi ilinniarnertuunngorniartoq nunaqarfimminiit Qaqortumut uteqqinnissamini Narsarsuarmit Qaqortumut billetisisinnaanngilaq.
AAMMA ATUARUK Isumaqatigiissutit atorunnaalersut: Illuatungiliuttut utaqqikatattut
- Nalorninarpoq taanna qanoq iliussaneraat Narsarsuarmiit Qaqortumut. Neriuppunga billeti iluatsissinnaassasoq januaarip aallartilaarnerani Narsarsuarmiit maanga, Konrad Kalia Qanoruumut ippassaq taama oqarpoq.
Isumaqatigiissutissatut siunnersuutit Naalakkersuisut akuerisimagaat attaveqarnermut naalakkersuisoqarfik tusagassiuutinut ippassaq unnukkut nalunaaruteqarpoq.
Ataatsimiititaliap suli tigunngikkai
Siunnersuutit Inatsisartut aningaasaqarnermut akileraartarnermullu ataatsimiititaliaannut saqqummiunneqassapput.
Ataatsimiititaliamili siulittaasuata Hermann Berthelsenip kiffartuussinissamut isumaqatigiissutissatut siunnersuutit ataatsimiititaliap suli tigusimanngikkai KNR-imut oqarpoq.
Ullumikkulli ullup ilaa tigunissai taassuma naatsorsuutigaa. Ataatsimiititalialli qaqugu isummerfigissanerai oqaatigisinnaanngilaa.
Qaqortumi ilinniarnertuunngorniartoq billetissani tamakkiisoq suli tigunnginnamiuk toqqissisimanngilaq.
-Piffissami qaninnermi tamaat isumannaareernissaa kissaatiginaraluarpoq. Kisianni neriuppunga qaammat ataaseq sioqqullugu tigoreersinnaasallugu, Konrad Kalia oqarpoq.
Kiffartuussinissamut isumaqatigiissutissatut siunnersuutit qanoq imaqarnersut attaveqarnermut naalakkersuisoqarfimmut itisilertinniarlugit paasiniaraluarpagut, kisianni Inatsisartut aningaasaqarnermut akileraartarnermullu ataatsimiititaliaannut saqqummiunneqartinnagit oqaaseqarfgisinnaanagit, tassanngaannit oqarput.
