Peqqinnissaqarnermik aaqqissuusseqqinnissamut atatillugu partiit ataatsimiigiaqqusaapput: - Quianaannarpoq
Peqqissutsimut Naalakkersuisoq Agathe Fontain (IA) partiinut tamanut aggersaavoq, Peqqinnissaqarnermik aaqqissuusseqqinnissaq ulluni oqaluuserineqassammat.
Ataatsimiigiaqqusinermi immikkoortut pingasunnguit peqqinnissaqarnermik aaqqissuusseqqinnissamik isumaqatigiinnikkiartoqqussuteqarnermi allassimapput:
- Peqqissutsimut naalakkersuisup aningaasaqarnermut inatsimmut 2024-mut kissaatai
- Partiit kissaataannut naleqqersuutit
- Pingaartitanik tulleriiaarinermik eqqartuineq
Ataatsimiigiaqqusineq Demokraatini oqaaseqartartup Bjørk Lange Olsen ippassaq toqqisisimanarpallaannginnerarpaa, illutungiliuttullu sinneri isumaqataapput:
- Suleriuseq eqqumiikkaluartoq ilimasuuteqarpallaanngilagut aaqqissuusseqqinnissamut iliuuseqarnissamullu saqqumiinissaannik. Aamma naalakkersuisut siulia saqqummiinikuunnginnami qanoq takorluuinerlutik. Kisianni soorunami ornigutissaagut takuniarlugu suna aggersaassutigineraat, Naleqqami siulittaasoq Pele Broberg oqarpoq.
Assinganik Atassutikkunni isumalluartoqarpianngilaq:
- Immaqa taalluaannarlugu oqarsinnaavunga, quianaannarpoq! Quianaannarporluunniit taamannak pissarsisinnaagatta. Immikkoortut pingasut Ajuusaarnangaarmat patsisissaaleqinarpoq. Naluarput iserutta qanoq suna siunertarissanerlugu taanna oqaloqatiginiarlerutsigu naalakkersuisoq. Taamak erseqqaritsigisumik oqariiginnaraanni, Atassummi siulittaasoq Aqqalu Jerimiassen oqarpoq.
Peqqinnissaqarnermik aaqqissuusseqqinnissamut suleriaasissaq suliarineqartussaavoq, tamanna nutaarasiassaanngilaq. Kisianni Naaja Nathanielsen (IA), Aningaasaqarnerut naalakkersuisuugami, aningaasanut inatsisissaq aggustimi saqqummiummaguli, aaqqissuusseqqinnissaq eqqaaqqinneqanngilaq. Illuatungiliuttullu misigipput, namminneq Agathe Fontainimukarlutik pilersaarummik apuussaqartussanngorlutik – uffa namminneq apuussivigineqartussaallutik.
- Tassami minnerpaamik tutsaqarsimasinnaagaluarpoq immikkoortunik toqqagassanik, soorlu taamani akileraartarnermut aaqqissuusseqqinnermut aningaasaqarnermut naalakkersuisup taamaaliorneratuulli. Toqqagassat assigiinngitsut inissillugit, taakkualu iluatungaanni pitsaanerpaasorisat arlaannik inissillugu, suleqatigiiffigalugu, ilusilersoqqillugu ingerlariaqqiffiusinnaasumik. Maannakkumut taamannak killiffigitillugit qanoq ililluta ingerlariaqqissagatta? Naalakkersuisoq ajoraluartumik tassani suliassani naammassisimanngikkaa ajuusaarnaqaaq, Aqqalu Jerimiassen oqarpoq.
Sulisussaaleqineq aaqqinneqassaasoq
Nunatta peqqinnissaqarfiata erloqinartorsiorluni ulluinnaqarnera aatsaat tusalinngilarput.
Sulisut aningaasallu amigaataapput.
Ilinniarsimasunik sulisoqarniarneq erloqinangaarmat paarlattaasartunut 2022-mi aningaasartuutit 40 millioni koruuniupput, ukiuni sisamani kinngullerni aatsaat taama qaffasitsigalutik. Kisitsisit paasissutissat Peqqinnissaq pillugu Ataatsimiititaliarsuup isumaliutissiissutaani 2023-mi saqqummersumi tigusaapput.
Aningaasanut inatsimmi peqqinnissaqarfik aningaasanik atuiffiunerpaavoq.
Partiit tamarmik isumaqatigiissutigisinnaavaat, ilinniarsimasunik sulisoqarniarneq aamma aningaasaqarniarneq aporfiit annersarigaat.
- Sipaarfissat arlaqaqaat piumagaluaraanni. Kisianni aamma taassuma saniatigut nakorsanik niviarsianillu ujarlertarpugut, Danmarkiinnarmi massakkumut. USA-mut qiviarnikuuvugut, tassani nakorsat assersuutigalugu 100.000 missaanniittut arlaqarput aningaasaannarnik aamma eqqarsanngitsut. Kisianni aamma inunnik allanik ikiuerusullutik maanga tikikkusussinnaasut, taamaammat pingaartorujuuvoq uagutsinnut pissarsinissaq ataavartumik maanna nunatsinniikkusuttunik ujarlernissaq sumiuussusaa aallaaviginagu. Kisianni ikiuukkusunnera innuttaasunut aallaavigalugu innuttaasummi pisariaqartikkamikku ataavartumik nakorsaqarnissaq, Pele Broberg (N) nassuiaavoq.
Atassutikkunni aamma sulisunik pissarsisinnaaneq pingaartutut taarusunneqarpoq.
- Tassami aningaasat ataasiakkaat pusittaqattaakutsoorsinnaavagut. Taakkua iluatungaanni aamma nikiserarsinnaasagut unammillernarsinnaagamik annertungaatsiartumik allanik isertitaqaataasut naatsorsuutigisamit isertitat eqqartorneqanngikkappata. Maannakkumut aningaasanut inatsisissatut siunnersuutit iluatungaaniittuniit nassaarniartariaqarpugut, Aqqalu Jerimiassen oqarpoq.
Aningaasat naammattut
Kisianniuna aaqqiisoqassappat aningaasat atorneqartariaqartartut.
Kisianni Naleqqamiit isumaqarput aningaasat ajornartorsiutaanngitsut. Kalaallit Illuinut Danmarkimiittunut aningaasaliissutaasartut sipaarutaasinnaasut oqaatigai.
- Pingaarnersiuineq avaqqunneqarsinnaanngilaq anaingaasat eqqartorneqartuarput uagut Naleqqamiit ersarissumik sipaarutissanik tikkuussinikuuvugut , tassami nunatsinni peqqinnissaqarfik pingaarnerua? Imaluunniit Kalallit Illuat Danmarkimi imaluunniit Danmarkimi aallartitaqarfik? Sipaarfissat arlaqaqaat piumagaluaraanni, Pele Broberg oqarpoq.
Atassutikkut aamma aningaasanik aallarfissanik taasaqarsinnaapput:
- Massakkut suli sulisussameerpugut. Illuatungaani sooq taava suli taamarsuaq Majoriamut atuisoqartassava? Aningaasanik tassa konto 37-minngaanniit iluaninngaanniit tassani Majoriamiit arlaatigut Peqqinnissaqarfimmut aningaasanik nuutsisinnaaneq, ilaatigut 25 millionit allaat eqqartorpagut tassani nassaarineqarsinnaassasut illuatungaanut nuutsinneqarsinnaanissaannut.
Sulisussaqalernissamut atugassat?
- Aap, Aqqalu Jerimiassen oqarpoq.
KNR-imiit Peqqissutsimut naalakkersuisoq Agathe Fontain (IA) oqaaseqartinniaraluarparput, sulili attaviginngilaatigut.
