Qinersinissamut oqallinneq: Partiit nunatsinni aatsitassarsiorneq ima ineriartortikkusuppaat

Kuannersuit uranilu qinersinissamut Nuummi pingasunngornermi oqallinnermi eqqartugaaqaat. Partiit Kuannersuit saniatigut aatsitassarsiulersaarnerit allat pillugit oqaaseqaqquneqarput, iluatsingaanngitsumilli.
Inatsisartunut Nuummi GUX-imi aqagu tallimanngornermi unnukkut nalunaaqutaq arfineq-pingasunut qiteqqunneraniit qineqqusaartoqassaaq.  Assi © : KNR
Allattoq Malik Brøns
apriilip 01-at 2021 16:34
Nutserisoq Hanne Petersen

KNR-TV-p qinersinissamut Nuummi pingasunngornermi oqallinneq toqqaannartumik aallakaatimmagu, Inatsisartunut qineqqusaartut aatsitassarsiorneq eqqartungaatsiarpaat.

Uranimik qanoq qalluitigisoqarsinnaanersoq apeqqutigineqaqqaarpoq. Uranimik ukiumut 500 tonsimik qalluisoqarpat ajoqutaanavianngila? 

Uran Kuannersuillu, tassa aatsitassarsiutileqatigiiffiup Greenland Mineralsip ilaatigut ukiumut 500 tonsinik uranisiulersaarfia, piffissami kingullermi oqallisaapput.

Partiilli apeqqut taanna erseqqissumik aknngilaat.

- Nunatsinni aatsitassarsiorneq sukarsuit ilagivaat. Aatsaat pinngortitamut avatangiisinullu sunniutaa ajunngippat, Siumup siulittaasua Erik Jensen oqarpoq.

AAMMA ATUARUK Tamaat isigalugu: Partiit Kuannersuarnut tunngatillugu ima iliorusupput

Demokraatit uranisiulersaartoqarneranut aamma ernumanngillat: 

- Kuannersuarni suliuniummi tamaat isigalugu uraneqassusaa 0,03 procentiuvoq. Taamaammat uagut ernumanngilagut, Demokraatit siulittaasuat Jens-Frederik Nielsen oqarpoq.  

Uranisiortoqassanngitsorli, Naleqqameersoq Hans Enoksen isumaqarpoq. 

- Pinngortitaq erlinnartoq, uumasut nerisaraagut, avatangiiseq erlinnarnerpaaq, allamiut iluanaartinniaarnarlugit aserorterneqassanngilaq, taamaammat uranimik qalluisoqassanngilaq, Naleqqap siuliuttaasua Hans Enoksen oqarpoq.

Kuannersuit saniatigut allani aatsitassarsiulersaarneq

Kuannersuit saniatigut allani aatsitassarsiortoqaleriaannaaneranik partiit tamatuma kingorna oqaaseqaqquneqarput. 

Aatsitassarsiorfiulereersut aatsitassarsiorfissatulluunniit akuerineqareersut taavaat.

Aatsitassarsiutileqatigiiffik Tanbreez Kujataani Killavaat Alannguanni aatsitassarsiornissamut aatsitassarsiutileqatigiiffillu alla, tassa  Dundas Titanium ilmenitimik Moriusami qalluinissamut akuerisaareerput. Aamma siorna akuerisaapput. Aatsitassarsiutileqatigiiffillu Ironbark zinkimik Citronen Fjordimi aatsitassarsiorfigeriikkamini piialersaartoq ilaatigut aamma oqaatigaat.

- Periarfissanik ulikkaarpoq. Taakkulu sammineqarnissaat pingaaruteqarpoq. Qineqqusaarnermi neriorsuuterpassuit assigiinngitsorpassuit tunniunneqarput. Neriorsuuterpassuit akissaqarfigissagutsigit taakkua pilersaarutit aamma inerisarnissaat pingaaruteqarpoq, Erik Jensen oqarpoq.

Maniitsup kujataani Napasup timaaniittoq nikkilisiorfiusinnaasoq annertoorujurujussuusoq ataatsikkorsuarli aatsitassarsiortoqarnissaa ingalassimassagipput, Atassummeersoq Siverth K. Heilmann oqarpoq.

AAMMA ATUARUK Kuannersuarni aatsitassarsiortoqalissappat naalagaaffik ataatsimoortumik tapiissutikinnerusalissasoq

- Suna tamarmi ataatsikkorsuaq aatsitassarsiorfigissallugu nukissaqanngilagut. Aamma silatusaarnerunngilaq, Siverth K. Heilmann oqarpoq.

Nunatsinnili nammineq aatsitassarsiulertariaqartugut, Inuit Ataqatigiit isumaqarput.

- Isumaqarpunga inuiaqatigiinni eqqarsartaaserput mumisilaartariaqaripput. Avataaninngaanniit maannga aatsitassarsioriartortussat utaqqiinnarnagit nammineq piginnaaneqarnerput aamma aallaavigalugu inerisaasinnaanerput upperinerulertariaqarparput, Inuit Ataqatigiit siulittaasuat Múte B. Egede oqarpoq. 

Kuannersuarnut saaqqittut

Kuannersuarni uranisiortoqalertariaqarpoq. Nunatta Qitornai taama isumaqartut, Aleqa Hammond allanik siunnersuuteqaqquneqareeraluarluni Kuannersuarnut saaqqinnermini taama oqarpoq.

- Kuannersuit nunarsuarmioqartigiinni piumaneqartorujussuuvoq saffiugassat qaqutigoortut pissutigerpiarlugit. Maannakkoqqinnaaq nunarsuarmioqatigiit pisariaqartippaat ineriartortitsineq qorsummik taasartagaat pissappat. Uagut nunatsinni aaliangiinnarsinnaanngilarput aatsitassat suut siulliutissanerivut, nunarsuarmi akii aaliangiisuummata, Aleqa Hammond oqarpoq.

Demokraatit Kuannersuarnut aamma saaqqipput.

- Killavaat Alannguannut akuersissummik tunisereerpugut, Dundas Titaniumillu Moriusami qalluinissaanut piaanissaanullu akuersissummik aamma tunisereerpugut, taaneqareertut ajunngillat, kisianni akilersinnaassusaatigut arlalitsigut ilaat ajornartorsiorput.

- Kuannersuit periarfissatsialaavoq nunatsinni, suliffissat 715-init ataavartut ukiuni 37-ini, Jens-Frederik Nielsen oqarpoq. 

Kuannersuarni uranisiulersaarneq taamaatikkallassasoq, Suleqatigiissitsisut kissaatigaat siunnersuutigalugulu, Naalagaaffeqatigiinni assersuutigalugu aatsitassarsiornermik ilinniartunut tapiissuteqartartussamik nunarput inuussutissarsiornermut ilinniartitaanermullu aningaasaqarfimmik Savalimmiut Danmarkilu suleqatigalugit pilersitsissasoq.

Suliniut tusarniaassutigineqaleruttorpoq - taamaammat Greenland Minerals Kuannersuarni aatsitassanik qaqutigoortunik piiaanissamut akuersissuteqarfigineqassanersoq ilisimaneqanngikkallarpoq.

Greenland Minerals piiaanissamut akuersissuteqarfigineqassanersoq, Naalakkersuisunngortut ilaatigut aalajangiiffigissavaat.

Inatsisartunut Nuummi GUX-imi aqagu tallimanngornermi unnukkut nalunaaqutaq arfineq-pingasunut qiteqqunneraniit qineqqusaartoqassaaq. 

Kommunimut qineqqusaarnerit qinersinissamullu oqallinnerit Nuummi GUX-imi arfininngornermi apriilip ulluisa pingajuanni ualikkut nalunaaqutaq pingasunut sapaammilu apriilip ulluisa sisamaanni ualikkut nalunaaqutaq pingasunut pissapput. KNR1-ikkut aamma malinnaaffigisinnaavatit.

Partiit siuttui ataasinngorpat apriilip ulluisa tallimaanni unnukkut nalunaaqutaq arfineq-pingasunut qiteqqunneraniit apeqqarissaarfigineqassapput.