Kuannersuarni aatsitassarsiortoqalissappat naalagaaffik ataatsimoortumik tapiissutikinnerusalissasoq
Kuannersuarni aatsitassarsiulersaarneq oqallisaaqisoq piviusunngussappat, australiamiut aatsitassarsioqatigiiffiata Greenland Mineralsip qaqutigoortunik saffiugassarsiornerani uranisiorneranilu ukiumut 1,5 milliardit koruunit nunatta karsianut ukiuni 37-ni tamani nakkartassapput.
Kuannersuarni aatsitassarsiulersaartoq, Greenland Minerals, nammineq taama naliliivoq.
Greenland Mineralsip 1,5 milliardit koruuninik nunatta karsianut ima isertitsisassangavoq:
- 136 millionit koruuninik sulisut aningaasarsiamikkut akileraarnerisigut
- 30 millionit koruuninik uranisiornermit akileraarnikkut
- 1,35 millardit koruuninik piginneqatigiiffimmit sinneqartoorutiniillu agguagarsianillu akileraarnikkut
Tassa imaappoq, ukiumut katillutik 1,516 millardit koruuninik akileraartassaaq.
Ukiuni 37-ni aatsitassarsiornermini katillutik 56 milliardit koruunit missaannik akileraarlunilu akileraaruteqassaaq.
Tusarfik: Greenland Minerals.
Imaanngilarli aningaasat taakkua tamarmik nunatta karsianut nakkaaginnassasut.
Nunarpummi ukiumut 75 millionit koruuninit amerlanerusunik isertitaqartillugu, naalagaaffik ataatsimoortumik tapiissutikinnerusassasoq, Namminersorneq pillugu inatsimmi allaqqavoq.
Tamanna naalagaaffiup aatsitassarsiornermit isertitat affaasa amerlaqataannik ataatsimoortumik tapiissutikinneruneranik kinguneqassaaq.
Tassa imaappoq, Kuannersuarni aatsitassarsiulertoqassappat nunarput tassannga ukiumut 1,5 milliardit koruuninik isertitaqartillugu, naalagaaffik ukiumut 750 millionit koruuninik ataatsimoortunik tapiissutikinnerussaaq.
Naalagaaffiup nunatsinnut ukioq manna ataatsimoortumik tapiissutai 3,9 milliardit koruuniupput.
Greenland Mineralsip aatsitassarsiuleraluarpat nunatta karsia aatsitassarsioqatigiiffiup aatsitassarsiornermit sinneqartoorutaanit isertitaqartillugu, naalagaaffik ukiumut 3,15 milliardit koruuninik tapiissutikinnerusassasoq naatsorsuilertornermi erserpoq.
Aammali naalagaaffik ukiumut ataatsimoortumik tapiissutikinnerusalissagaluarpalluunniit, nunatta karsia 750 millionit koruuninik isertitaqarnerulissaaq.
Tassa imaappoq, naalagaaffimmit ataatsimoortumik tapiissutit 3,15 milliardit koruunit aatsitassarsiornermillu 1,5 milliardit koruunit, katikkaanni 4,65 milliardit koruunit, nunatta karsianut ukiumut nakkartassapput.
Aningaasat taakku mittarfissualiornermi immaqa aningaasaalatsiunnaarutaasinnaapput.
Kalaallit Airports Internationalimi Nuummi Ilulissanilu mittarfissualiamik naammassinissaannut 900 millionit koruuninik attartornissamik periarfissarsiorumavoq.
"Aningaasaqarnikkut namminiilernissamut alloriarnivissuusoq"
Javier L. Arnaut Ilisimatusarfiup Inuiaqatigiilerinermut, Aningaasaqarnermut Tusagassiornermullu immikkoortortaqarfiani adjunktiuvoq.
Aatsitassarsiulersaarneq piviusunngussappat tamanna aningaasaqarnikkut namminiilivinnissamut alloriarnivissuussasoq, taanna isumaqarpoq.
Namminersorlutik Oqartussat aatsitassanut inatsisaat:
§ 8. Kalaallit Nunaanni Namminersorlutik Oqartussat Kalaallit Nunaanni atortussiassanik aatsitassanik iluaquteqarnikkut isertitaqassappata, tak. § 7, naalagaaffiup Namminersorlutik Oqartussanut tapiissutai ukiumi pineqartumi isertitat 75 mio. kr.-nit amerlanerussutaasa affaannut naleqquttumik apparneqassapput.
Tusarfik: Naalakkersuisut.
- Avatangiisinut sunniutaasinnaasunik naliliinerit (ASN) assortuussutaaqisut eqqaasanngikkaani, Kuannersuarnilu aatsitassarsiulersaarneq akuerineqassappat, Kalaallit Nunaata qaqutigoortunik saffiugassarsiornermut uranisiornermullu politikkiata inatsisitigut akuerineqarneranik kinguneqartumik aningaasaqarnikkut namminiilernissamut alloriarujussuaqqaatigisinnaavaa, taanna oqarpoq.
- Kuannersuarni aatsitassarsiulersaarneq aatsitassarsiulersaarnerpassuit ilaannarigaat eqqamasariaqarpoq. Taamaammat Naalakkersuisut nunani allani aatsitassarsioqatigiiffiit allat aatsitassarsiornissaannut akuersinissartik isumaliutigaat. Tamanna Kalaallit Nunaata aningaasaqarnikkut imminut pilersornerulerneranik kinguneqassaaq, Javier L. Arnaut oqarpoq.
