Qinersinermut peqataanissaminnut nalunaarnissaminnut piffissaqarnerulerput
Inatsisartunut qinersinissamut Danmarkimi ilinniagaqartut kingusinnerpaamik qinnuteqarnissaannut ulloq kinguartinneqarpoq. Danmarkimi ilinniagaqartut kattuffiat, Avalak, taama ilisimatitsivoq.
apriilip 20-at 2009 07:44
Maleruagassat maanna atuuttut naapertorlugit ilinniagaqartut kingusinnerpaamik aqagu apriilip ulluisa 21-anni qinnuteqartussaagaluarput, piffissaliussarli sivikippallaarujussuarmat Namminersornerullutik Oqartussat immikkut akuersipput, ilinniagaqartullu qinnuteqarnissaat maajip ulluisa aqqaneq-aappaannut kinguartinneqarpoq, aqagumiilli nalunaarsinnaanngussapput.
- Tamanna nuannaarutigeqaarput. Sapaatip- akunnerata naanerani ulapaaqaagut, ilinniartunit saaffigineqaqattaaqaluta. Piffissaliussaq maanna
sivitsorneqarmat eqqissisimanerulluta piareersarsinnaanngussaagut, Avalammi siulittaasoq, Aqqaluk Petersen, oqarpoq.
Avalaap nittartagaani paasissutissanik amerlanerusunik pissarsisinnaavusi, qinnuteqaatissarlu tassani aamma aaneqarsinnaavoq.
