Qeqqata Kommunia saariarfissaaruttoq: Kangianit perorsaasutut ilinniagalinnik sulisussarsiorniartoq

Kangiamiut kalaallisut oqalussinnaanngitsut nunatsinni meeqqerivinni sulisorineqartut. Eqqarsaat immaqa takorloorneqarsinnaanngikkaluarpoq.

Sisimiunili Qeqqata Kommuniani meeqqerivinni ima sulisussaaleqisoqartigaaq, allaat maannakkut kangiamiunik meeqqerivinni sulisussanik ujartuisoqalerluni.

Sisimiuni meeqqerivinni sulisussaaleqineq ukiuni kingullerni ima annertutigalunilu ajornartorsiutaatigaaq, allaat meeqqerivinni meeqqat ataasiakkaat naammattumik piffissaqarfigineqartaratik.

Ajornartorsiullumi angajoqqaanut meeqqerivinniittuutilinnut eqquinerluttarpoq.

Ajornartorsiut ullumikkut ima ilungersunartigaaq allaat sulisut akornanni napparsimasoqangaatsiarnera pissutigalugu meeqqeriviit arlallit matoqqasariaqartarlutik. Angajoqqaat taamaalillutik sulisussaagaluarlutik meeqqatik angerlarsimaqatigiinnartariaqartarpaat.

Kangianit sulisussarsiorniartoq

Qeqqata Kommuniani suliffissaaleqisut procentinngorlugu 2,4-miippoq, kisitsillu annertugisassaanngitsoq Borgmesterip Malik Berthelsenip (S) oqaatigaa.

Qeqqata Kommuniatali ajornartorsiutaasoq aaqqiiviginiarlugu kangiamiunik perorsaasutut ilinniagalinnik tikisitsiniarluni aalajangerpoq.

- Aap tassa taakkkua inuit-qulit sulisorilerusutagut massakkut kinaassusersineqarnissaat sulissutigineqarpoq, taakkualu kikkuussanersut aalajangerneqareerpata nunatta avataaninngaanniit tikisinnissaannut akuersissutit tassa pissarsiareriarutsigit sukkanerpaamik tikisikkusuppagut.

- Siusinnerusukkulli taanna eqqarsaat eqqarsaatigisareernikuuarput. Kisianni tassa pissutsit ilungersunarmata taavalu allamik aallerfissaqannginnatta ukioq manna pinngitsoorata aalajangersimavugut, allatut ajornaqaaq, misilinniartigu kangiamiunik tikisitsinissarput, borgmesteri oqarpoq.

Meeqqanilli paarsinissamut tunngatillugu allaanerusoqarpoq. Taamaakkaluartorli kommunip periarfissaq atorniaraa, Malik Berthelsenip oqaatigaa:

- Uagut suut piumasarinerlugit taakkununnga apuunnikuuagut. Tassa uagut tungitsinninngaanniit piumasarinikuuarput sulisussat perorsaanermik misilittagaqarsimasuunissaat.

Oqaatsitsinnik ilinniapallassasut

Taakku perorsaanermik misilittagaqarnissaasa saniatigut allamik pingaaruteqartumik aamma piumasaqaateqarpoq.

- Tikeriarpata oqaaatsitsinnik ilinniarnissaat. Aamma kangiamiut takusareerpagut nunatsinni sulisut oqaatsitsinnik qanoq poqertiginersut.

- Taamaammat naatsorsuutigivarput aamma ukua tikittussat ilikkapallannissaat. Ingammik meeqqat akornanniileriarunik, Malik Berthelsen oqarpoq.

Sisimiuni meeqqerivimmut suliartortussat qaqugu tikissanersut suli inissinneqanngilaq.

- Uani apeqqutaasorujussuuvoq nunatta avataaninngaanniit tikisitsinissamut akuersissutit qanoq sukkatigisumik pissarsiarisinnaanerigut. Taanna apeqqutaasussaavoq.

Maniitsumi nunatta avataaniit suliartortussanik aamma tikisitsinissaq kommunimiit sulissutigineqarpoq. Uanilu utoqqaat angerlarsimaffianni Neriusaami sulisussanik tikisitsiniartoqarluni.