Qeqqani Qeqertalimmilu tunillatsissimasut amerliartortut - avannaani ikiliartorput

Qeqqata Qeqeraliullu Kommuniani coronamik tunillatsissimasut amerliartorput.

Avannaata Kommunianili tunillatsissimasut ikiartorput.

Coronamik tunillatsissimasut amerlassusaat pillugit nun.gl-ikkut ullumikkut nalunaaqutaq 15.20 saqqummersinneqartut naatsumik taama imaqarput.

Pitsaanerusut aallarniutigissavagut:

• Avannaata Kommuniani tunillatsissimasut maanna 13-iupput. Taakku ippassarmit qulinik ikinnerulerput.
• Kommune Qeqertalimmi tunillatsissimasut maanna 27-upput. Taakku ippassarmit arfinilinnik amerlanerupput.
• Qeqqata Kommunia tunillatsissimasut ullumikkut 14-iupput - ippassarmiillu pingasunik amerlanerulerlutik. 
• Kommuneqarfik Sermersuumi tunillatsissimasut arfinilinni uninngapput, Kommune Kujallermilu tunillatsissimasunik nalunaarsuisoqanngiivilluni. 

Illoqarfinni sorlerni tuniluuttoqarnerunersoq sumilu ikiliartornersut KNR-ip paasiniaraluarpaa. Tamannali corona pillugu allattoqarfiup nakorsaaneqarfiulluunniit tallimanngornermi ualikkut akissuteqarfigisinnaanngilaa.

Nunatsinni tunillatsissimasut katillugit maanna 60-iupput.

Tunillatsissimasut amerlanerit maanna inuusuttuupput. Tamanna nakorsaanerup, Henrik L. Hansenip tusagassiortunik ippassaq katersortitsinermi oqaatigaa. Upernavimmi Tasiusamilu tunillatsissimasut agguaqatigiissillugit 31-nik ukioqartut nakorsaanerup oqaatigaa.

AAMMA ATUARUK Paasissutissat: Nunatsinnut angalasut tamakkiisumik akiuussuserneqarsimassasut Sisimiunilu malittarisassat nutaat

Aasiaanni tunillatsissimasut ukiui agguaqatigiissillugit aamma appasittoq, nakorsaaneq oqarpoq.

Sisimiuni ullualunni coronamik tunillatsissimasoqanngereerluni tunillatsissimasut nutaat ippassaq paasineqarput. Sisiamanilli nutaanik tunillatsittoqarsimanera marlunngornermi unnukkut kingusissukkut uppernarsarneqarpoq.

- Sisimiuni tuniluuttoqarnerata unitsinnissaa iluatsereernikuuarput. Tuniluuttoqaqqilerporli - illoqarfimmilu inuit imminnut qanillisimanngitsut akornanni tuniluuttoqalerluni. Aappa napparsimmaviup iluani. Tuniluuttullu aamma taama isikkoqarput: Inuusuttut, akiuussutissamik kapitissimanngitsut imaluunniit tamakkiisumik akiuussutisserneqarsimanngitsut akornanni, nakorsaaneq ippassaq oqarpoq.

Tunillatsittut aatsaat taama amerlatigisut

Juulip qaammataata aallartinneraniilli tunillatsissimasut amerliartuinnavipput - nunatsinnilu coronamik siorna marsimi tunillatsissimasoqaqqaarneranit aatsaat taama amerlatigilerput.

Tunillatsissimasunik nalunaarsuinerit arlaleriarluni 0-imiissimavoq - kisitsit taanna juulip aallaqqaataani aamma 0-imiippoq - tunillatsissimasulli tamatuma kingorna amerliartuinnalerput.

Tuniluunneq Ilulissani, Nuummi Qaqortumilu aallartippoq - tunillatsissimasullu taakku tamarmik nunatsinnut Københavnimiit timmisartorsuarmut juulip ulluisa arfernanni marlunngornermi ilaaqatigiissimallutik.

AAMMA ATUARUK Coronapas pisiniarfinni piumasaqaataassanngilaq: Malittarisassat unnuap-qeqqanit atuutilertussat aaku

Taakku coronamik tuniluutianerusumik deltamik tunillatsissimasuupput, tuniluunnerlu sineriammi illoqarfinnut siaruaappoq.

Tamatuma kingunerisaanik killilersuinerit sukannersut tassa inuit amerlanerpaamik 20-oqqusaanerat kikkullu tamarmik tamanit ornigarneqartuni qanermut assiaquteqaqqusaanerat atuutilersinneqarput.

Malittarisassalli taakku nunatsinni sumiiffinni amerlanerpaani arfininngornermi atorunnaarsinneqarput. Taakkununngalu taarsiullugu tamakkiisumik akiuussuserneqarsimanermut uppernarsaat imaluunniit coronamik tunillatsissimannginnermut uppernarsaat sivisunerpaamik akunnernik 48-nik pisoqaassuseqartoq atorlugit neriniartarfimmut, timersortunut, imerniartarfinnut, atuakkanik atorniartarfimmut, filmertarfimmut allanullu aatsaat isertoqarsinnaalerpoq.

Pisiniarfimmut atuarfimmulluunniit iserniaraanni tunillatsissimannginnermut uppernarsaateqarnissaq tamakkiisumilluunniit kapitissimanissaq piumasaqaataanngilaq.

Aasianni, Upernavimmi Upernaviullu nunaqarfiini piffissami matumani aqunneqarsinnaanngitsumik tuniluuttoqarnera pissutigalugu malittarisassat atuutiinnarput.