Qaqqaq nakkaariaannaasoq pillugu nalunaarusiaq nutaaq: Nunaqarfiit pingasut aarlerinartorsiornerpaapput
Uummannap Sulluani Kangerluarsummi Qaqqaq Kigarsima nakkaaratarsinnaasoq, qaquguli nakkaanissaa eqqoriaruminaatsoq Danmarkimi nunap sananeqaataanik misissueqissaartarfik GEUS nalunaarpoq.
Kigarsima nakkaassappat Qaarsut, Niaqornat Ukkusissallu tassaarsuarmit eqqugaanerusinnaasut, tassaarsuarli, Karrat 2017-imi nakkaammata tassaarsuaqarneranit eqquinikinnerussasoq GEUS allappoq.
Uummannap Sulluani Kangerluarsummi qaqqaq Kigarsima nakkaassappat, Uummannap Sulluani inoqarfiit tamarmik tassaarsuarmit minnerusumik annerusumillu eqqugaassasut, Danmarkimi nunatsinnilu nunap sananeqaataanik misissueqqissaartarfiup GEUS-ip nalunaarusiaani atuarneqarsinnaavoq.
AAMMA ATUARUK Uummannap kangerloqarfiani qaqqat qajannartut pillugit tassaarsuarmut najoqqutassiaq nutaaq eqqornerusorlu
GEUS-ip Norgemi qaqqat nakkaasarnerinik immikkut ilisimasalinnik suleqateqarluni misissueqqissaarnermini paasivaa, Kigarsimap ilaa imaanut siunissami nakkaassappat nunaqarfiit Ukkusissat, Niaqornat Qaarsullu tassaarsuarmit eqqugaasinnaanerusutut inissisimassasut.
Qaqqat nakkaasarnerannik immikkut ilisimasalik GEUS-imeersoq Marie Keiding ima nassuiaavoq:
- Qaqqap ilaa uninngajunnaarluni sisujartulersimasoq misissoratsigu annertussusialu naatsorsoratsigu paasivarput, nakkaaratarsinnaanera ilimanaateqartorujussuusoq. Marie Keiding oqarpoq.
- Takusinnaavarput qaqqap ilaa sisujartuaarusaaginnalersimasoq. Qaqqap ilaa imaanut nakkaruni malerujussualersitsisinnaavoq, malerujussuarlu nunaqarfinnik eqqaaniittunik eqquisinnaavoq, Marie Keiding oqarpoq.
Geologit naliliinerannik Naalakkersuisut nittartagaanni paasisaqarnerusinnaavutit.
Qaqqap qaqugu nakkaanissaa eqqoriaruminaattoq
Qaqqat nakkaaqqajaasut allat pillugit misilittagaqareeraluarluta Kigarsimap ilaa qanoq sisujartortigereerluni naakkaalissanersoq oqaatigisinnaanngilarput. Taamaammat qaqugoqqissaaq nakkaalernissaa oqaatigiuminaappoq.
Kigarsima nakkaassappat Ukkusissat, Qaarsut Nioqornallu taassaarsuarmit eqqugaanerpaasinnaasut Marie Keiding nassuiaavoq.
Tassa qaqqaq nakkaassappat Ukkusissat Kigarsimamit 29 kilometerinik ungasissusilimmiittoq minutsit tallimat qaangiunneranni tassaarsuarmit minnerpaamik meterinik marlunnik portussusilimmit ajornerpaamillu meterinik arfineq marlunnik portussusilimmit anguneqassapput.
Qaarsut Kigarsimamit 58 kilometerinik ungasissusilimmiittoq tassaarsuup minnerpaaffimmini meterinik marlunnik portussusillip ajornerpaamillu meterit qulit angullugit portutigisup minutsit 13-it qanngiunneranni angussavaa.
AAMMA ATUARUK Nuugaatsiap tassaarsuarmit eqqugaanera takuuk
Niaqornat Kigarsimamiit 73 kilometerinik ungasissusilimmiittoq minutsit 15-it qaangiunneranni tassaarsuarmit minnerpaaffimmini 1,5 meterit angullugit portutigisup ajornerpaamillu meterinik tallimanik portutigisup angussagai, GEUS nalunaarusiamini allappoq.
Qaqqat nakkaariaannaasututut naliligaasut arlaqartut
2017-imi Karranit imaanut nakkaasoqarmat taamani malerujussuaq 75 meteriniit 100 meterit tungaannut portussuseqarsimasoq, malerujussuilli ingerlaartillutik pukkiliartortartut GEUS-imeersoq Marie Keiding aamma oqarpoq.
Kigarsima Karrat kangerluata ungasinngisaaniippoq. Karrat kangerluanni qaqqaq 2017-imi nakkaavoq.
Karranilu qaqqat pingasut nakkaariaannaasut aamma ilisimaneqarpoq.
Tassaarsuaqarneranut takussutissat nalinginnaasut
Sumiiffinni tamani tassaarsuartoqarneranik aarlerisaarisoqartillugu aarlerisaarinerit ilumoorunneqartassapput. Tassaarsuaq sineriammut apuuppat imaq nalinginnaasumit tininnerujussuussaaq imaluunniit imaq annertoorujussuarmik ulissaaq.
Soorluttaaq taamatut pisoqarnerani qimmit eqqissiveerussinnaasartut. Taamatut aarlerinartumik malussarniaraanni piaartumik sissaq qimanneqartariaqarpoq. Nalinginnaasumik sissamit qummut qatsissumukarlutit ingerlasassaatit. Meterit qullarterfitit tamaasa annassutigisinnaavatit.
Tusarfik: Namminersorlutik Oqartussat
Qaqqat nakkaariaannaasutut nalilerneqartut, Karrat 1-imik, Karrat 2-mik, Karrat 3-millu taaguuserneqarput.
Qaqqat nakkaariaannaasut pingajuat Karrat 3-mik taaneqartoq nakkaassappat Karrat 2017-imi nakkaaneranit sakkutunerujussuarmik tassaarsuaqartitsisinnaavoq.
Kisianni Kigarsimap nakkaanissaa ilimanaateqartorujussuuvoq, taannalu nakkaassappat Karrat 3-mik taaneqartup nakkaassappat taassuma tassaarsuaqartitsinissaanit annikinnerusumik tassaarsuaqartitsissasoq, kisiannilu Karrat 1-ip Karrat 2-llu nakkaassagunik tassaarsuaqartitsinissaannit annerusumik tassaarsuaqartitsissasoq, GEUS-ip nalunaarusiaani atuarneqarsinnaavoq.
