Qaqortumi inuit: Maannakkut qinersisoqarnissaa pisariaqarluinnarpoq
Nunatsinni apriilip ulluisa arfernanni qinersisoqassaaq. Tamanna Inatsisartut ippassaq akueraat.
Ullormi tassani kommunimut qinersisoqarlunilu aamma ilagiinnut qinersisoqassaaq.
Qaqortumi inuit marluk qinersiartornissamut qilanaarput.
- Allatut ajornaqaaq, silaannaq salinneqassappat inatsisartuni taamak pisoqartariaqalersimagami naammagittarluta atuinnassavarput, Lars Frederik Karolussen oqarpoq:
- Tassa ilimagereersimavara qangali isaqqajaasarnerat naapertorlugit.
Siumup iluani qaammaterpassuarni isumaqatigiinngittoqarnera sapaatini akunnerni kingullerni marlunni pingaartumik sakkortusimavoq.
Siumup siulittaasortaavata Erik Jensenip partiit allat matut matoqqatillugit isumaqatigiinniarfigai, taamaalillunilu Kim Kielsen Naalakkersuisut siulittaasuatut aamma uppisissinnaallugu.
Partiilli allat Erik Jensen suleqatigigerusunngilaat – Demokraatillu naalakkersuisoqatigiinnit februaarip ulluisa arfineq-pingajuanni tunuarput: Taakku partiip oqarnera naapertorlugu Siumumi isumaqatigiinngitsoqarnera aamma nunatta kujataani Kuannersuarni aatsitassarsiortoqarsinnaaneranut nutaamik qularnerusumillu isumaqartoqarnera pissutigalugu peqataarusukkunnaarput.
AAMMA ATUARUK Ulloq aalajangerneqarpoq: Apriilip ulluisa arfernat qinersissaagut
Naalakkersuisoqatigiit taamaalillutik ikinnerussuteqaleriataarput.
Inatsisartuni amerlanerussuteqartut qinersisoqarnissaanik ataasinngormat siunnersuuteqarput – piumasaqaallu taanna amerlanerussuteqartut ippassaq akueraat.
- Neriuppunga kiinnanik nutaanik takusassaqarluassasugut, taakku pisoqasaangornikut ilaat aamma qinigassanngorteqqinniartut malunnarpoq, Lars Frederik Karolussen oqarpoq.
Angerdla Kielsen Olsenip maannakkut qinersisoqarnissaanit allatut aqqutissaqanngitsutut aamma isigaa:
Suliap naatsumik oqaluttuarinera
Demokraatit Kim Kielsen ikinnerussuteqartumik naalakkersuisoqatigiinniilersillugu Naalakkersuisunit februaarip ulluisa arfineq-pinguat ataasinngornermi tunuarput.
Naalakkersuisoqatigiit Siumut Nunatta Qitornaalu Inatsisartuni ilaasortaaffinni 31-usuni aqqanilinnik ilaasortaatitaqarput.
Siumup siulittaasortaava Erik Jensen Kim Kielsen taarserlugu Naalakkersuisunut siulittaasunngorusuppoq.
Taanna partiiminni Kim Kielsen taarserlugu novembarimi siulittaasunngorpoq.
Partiilli illuatungiliuttut Erik Jensen siulittaasoralugu nutaani naalakkersuisoqatigiinniilerusunngillat.
Siumut iluani isumaqatigiinngittoqarpallaartoq taakku isumaqarput.
Matumani Kuannersuarni aatsitassarsiornissamik suliniummut, aatsitassanik qaqutigoortunik uranitalimmillu piiaanissamik kissaateqartoqarneranut tapersersuineq annikilliartorpoq.
Siumut aatsitassarsiornissamut suliniummut ukiuni 14-ini tapersersuisuugaluarput.
- Qinersisariaqarpugut, kisianni uggornarpoq politikkikkut taamak inissittoqartarnera, suliatigut taavalu nunatta ingerlanneqarneranut sunniuteqartarmat.
Tamannali tupaallaatiginngilaa.
- Qinersisartutut uanga naatsorsuutigaara allannguuteqartoqartariaqartoq qinersilerutta.
Qinersisartunik isumasiuineq naapertorlugu aqagu qinersigaluarutta Inuit Ataqatigiit nunatsinni partiini annerpaanngortussaarpasilluni 38,4 procentinit taaguunneqassaaq.
Ilisimatusarfimmit ilisimatuut eqimattat isumasiuisuupput, isumasiuineq januaarimi Demokraatit naalakkersuisoqatigiinnit suli tunuannginneranni suliarineqarpoq.
AAMMA ATUARUK IA qinersisartunik isumasiuinermi nutaami siuariaqisoq
Isumasiuineq naapertorlugu Siumut kingullermik decembarimi isumasiuisoqarneranit kinguarialaassaaq. Aqagu qinersigaluarutta Siumut 29,4 procentinit taaguunneqassaaq Inatsisartunullu qulingiluanik qinigaatitaqassalluni.
Siumut ullumikkut qulinik qinigaatitaqarpoq.
Demokraatinut allaaneruvoq. Demokraatit qinersisartut 11,3 procentiinnaanit taaguunneqassaaq – taamaalilluni partiip kinguariartornera ingerlaannassalluni.
2018-imi qinersisoqarmat Demokraatit 19,5 procentinit taaguunneqarpoq.
Isumasiuineq naapertorlugu aqagu qinersisoqaraluarpat Suleqatigiissitsisut Nunatta Qitornaalu Inatsisartunut qinigaassanngillat.
