Ulloq aalajangerneqarpoq: Apriilip ulluisa arfernat qinersissaagut
Inatsisartuni politikerit akunnerit tallimat unikkallareerlutik qinersinissamut kiisami ulluliipput - nunatsinni inatsisartunut apriilip ulluisa arfernanni qinersisoqassaaq.
Ulloq taanna aamma kommunimut qinersisoqarlunilu ilagiinnut qinersisoqassaaq.
Tamanna Inatsisartuni akuerineqarpoq.
Ulloq apriilip ulluisa arfernat qinersisoqarnissaanut siunnersuummi aamma allassimavoq.
Suliap naatsumik oqaluttuarinera
Demokraatit Kim Kielsen ikinnerussuteqartumik naalakkersuisoqatigiinniilersillugu Naalakkersuisunit februaarip ulluisa arfineq-pinguat ataasinngornermi tunuarput.
Naalakkersuisoqatigiit Siumut Nunatta Qitornaalu Inatsisartuni ilaasortaaffinni 31-usuni aqqanilinnik ilaasortaatitaqarput.
Siumup siulittaasortaava Erik Jensen Kim Kielsen taarserlugu Naalakkersuisunut siulittaasunngorusuppoq.
Taanna partiiminni Kim Kielsen taarserlugu novembarimi siulittaasunngorpoq.
Partiilli illuatungiliuttut Erik Jensen siulittaasoralugu nutaani naalakkersuisoqatigiinniilerusunngillat.
Siumut iluani isumaqatigiinngittoqarpallaartoq taakku isumaqarput.
Matumani Kuannersuarni aatsitassarsiornissamik suliniummut, aatsitassanik qaqutigoortunik uranitalimmillu piiaanissamik kissaateqartoqarneranut tapersersuineq annikilliartorpoq.
Siumut aatsitassarsiornissamut suliniummut ukiuni 14-ini tapersersuisuugaluarput.
Inuit Ataqatigiit Nunattalu Qitornaasa ulloq taanna qinersisoqarnissaa Inatsisartuni timerpaaluit ullumi oqallittoqarnerani allanngorteqqutagaluarpaat. Taakku kommunimut ilagiinnullu qinersinerit Inatsisartunut qinersinernit tunulliunneqarnissaat ernumassutigalugu taamaaliorput.
Nalunaaqutarli 19:10-nngortoq nunatsinni Inatsisartunut ulloq apriilip arfernanni qinersisoqarnissaanut amerlanerussuteqangaatsiartut 27-iusut akuersipput.
Qinersisoqarnissaanut ippassaq siunnersuuteqartoqartoq
Oqallinneq ulloqeqqata eqqaani nalunaaqutaq aqqanermulli aallartinneqarpoq.
Tamanna nunatsinni politikkikkut sapaatini akunnerni arlalinni pisoqangaatsiareerneratigut aalajangerneqarpoq.
Illuatungiliuttut partiivi tassaasut Inuit Ataqatigiit, Demokraatit, Naleraq Atassullu tusagassiuutinut ippassaq naatsumik nalunaaruteqarnerminni qinersisoqarnissaanik kaammattuuteqarput.
Qinersisoqarnissaanut siunnersuut Inatsisartunit akuerineqarpoq - tamannalu nalunaaqutaq aqqanermulli oqallisigineqarpoq.
Kielsen: Tamassinnut qujanaq
Qinersinissaq isumatsialaanersoq pillugu politikerit oqallinnissaasa aallartinnginneranni Kim Kielsen (S) maanna Naalakkersuisunut siulittaasuusimasoq oqaaseqartarfimmit oqaaseqarpoq.
- Ataqqinartut tamassi. Tassa qinigaaffik una naavoq. Ikerinnakkut naavoq, pisut assigiinngitsut peqqutigalugit. Taamaattorli siumut isigisariaqarpugut, tassami ullut, aqagussaq allaasarpoq ullumikkuminngaanniit. Piareersimasariaqarpugut maani nunatsinni ataatsimuussuseqarnissamut, Kim Kielsen qinigassanngorteqqinniartoq oqarpoq.
- Aporaattarsimaqaagut, politikkili taamaappoq.
AAMMA ATUARUK Erik Jensen qinersineq pillugu: Politikkut pissutsit Siumup pingaartumik akisussaaffigai
- Aamma tulluusimaarutigisinnaasatsinnik aalajangiinerpassuaqarpugut. Amerlanertigullu isumaqatigiittarpugut.
- Inatsisartut nutaat qanoq suliaqarumaarnersut takunissaat qilanaarnarpoq. Immaqa affaat qinigaaqqissanngillat.
Politikerit taamaammat Inatsisartunut ataatsimiinnermit marluk qaangilaaraali unikkallaqqalerput. Inatsisinut ataatsimiititaliallu apeqqut tuaviortumik suliaraa.
Ataatsimiititalialli ualip ilarujussua taanna kisiat samminngilaat.
Qinersinissamimmi suaaruteqartoqarneratigut Naalakkersuisut Inatsisartullu tunngaviusumik imminnut atorunnaarsissapput. Kikkummi Inatsisartuni issiassanersut qinersisartunit aalajangerneqartussaavoq.
Naalakkersuisut qinersinermut inatsimmut allannguutissatut siunnersuummik politikerinit qinikkanik aalajangiiffigineqartussamik aamma siunnersuuteqarput.
Taanna coronamut pissutsinut tunngatillugu qinersinerup qaangiutinnginnerani aalajangiinissat pisariaqartut Naalakkersuisunit aalajangiiffigineqarsinnaanissaannut ilaatigut qulakkeerisoqassaaq.
Tamatuma saniatigut Naalakkersuisut sanaartornermut suliniutinut aalajangersimasunut aamma aalajangiinissamut periarfissaqassapput.
Tassa Naalakkersuisuugallartut sulianut coronamut tunngasunut sanaartorneqartussanullu tunngasunut aalajangiisinnaanerannik tamanna isumaqarpoq.
Aalajangiisoqassatillugulu partiit siulittaasui Inatsisartuni ilaasortat minnerpaamik pingajorarterutaasut tapersiisassapput.
Inatsisinulli ataatsimiititaliap Naalakkersuisut qineqqusaarnerup nalaanni periarfissaqarnerunissaat siunnersuutigaa. Ataatsimiititaliap siunnersuummut oqaaseqaammini nutaami ’aalajangiinissat taakku inuiaqatigiinnut pingaaruteqartunut tamanut kinguartinneqarsinnaanngitsunut’ tunngasariaqartut allappaa.
