Erik Jensen qinersineq pillugu: Politikkut pissutsit Siumup pingaartumik akisussaaffigai
- Pissutsit ullumikkut inissisimaffigisagut pingaarnertut akisussaaffigalutigit eqqaamassavarput. Akisussaaffitsinnik qimarratiginninnianngilagut.
Partiit sisamat tassa Inuit Ataqatigiit, Demokraatit, Partii Naleraq Atassullu Naalakkersuisunut tatiginninnginnerminnik oqariartuuteqarnerata kingunerani Siumup siulittaasua, Erik Jensen oqarpoq, taamaalillunilu qinersinissaq ilimanarluni.
Suliap naatsumik oqaluttuarinera
Demokraatit naalakkersuisoqatigiinnit ataasinngormat tunuarmata Kim Kielsenip naalakkersuisoqatigiivi ikinnerussuteqalerput.
Naalakkersuisoqatigiit Siumut Nunatta Qitornaalu Inatsisartuni ilaasortaaffinni 31-usuni aqqanilinnik ilaasortaatitaqarput.
Siumup siulittaasortaava Erik Jensen Kim Kielsen taarserlugu Naalakkersuisunut siulittaasunngorusuppoq.
Taassuma Kim Kielsen taarserlugu novembarimi siulittaasunngorpoq.
Partiilli illuatungiliuttut Siumup siulittaasortaavata naalakkersuisoqatigiivinut ilaarusunngillat.
Siumut iluani isumaqatigiinngittoqarpallaartoq taakku isumaqarput. Matumani Kuannersuarni aatsitassarsiornissamik suliniummut, aatsitassanik qaqutigoortunik uranitalimmillu piiaanissamik kissaateqartoqarneranut tapersersuineq annikilliartorpoq.
Inatsisartuni amerlanerussuteqartut maanna qinersinissamik suaaruteqartoqartikkusuppaat.
Naalakkersuisut siulittaasuat, Kim Kielsen nammineerluni tunuanngippat qinersisoqarnissaa partiit namminneq aallartissinnaavaat.
Partiimit Naalakkersuisunut Naalakkersuisulluunniit siulittaasuanut tatiginninnginnermik taasisoqarnissaanik siunnersuuteqartoqarneratigut taamaaliortoqarsinnaavoq.
Naalakkersuisut siulittaasuat tunuassaguni qinersisoqarnissaanik suaaruteqarsinnaasoq imaluunniit siulittaasuuffik Inatsisartuni ilaasortamut allamut ingerlateqqissinnaallugu.
Siulittaasoq nutaaq naalakkersuisunik nutaanik Inatsisartunit amerlanerussuteqartut tapersigaannik inissiissaaq.
- Innuttaasut suleqatigiinnerusoqarnissaanik kissaateqarput, tamanna tusarnaarparput iliuuseqarfigisariaqarlugulu. Siumut gruppimik tusarnaarnissaq kisimi pingaaruteqarpoq. Suliniutit aappaagumut piareertussaagaluartut qinersisoqarnissaa pissutigalugu taamaatinneqarnissaat Siumumut soorunami uggornarpoq, Erik Jensen oqarpoq.
AAMMA ATUARUK Maannakkut: Illuatungiliuttut qinersisoqarnissaanik piumasaqartut - Kim Kielsenilu tamanut qujassuteqartoq
Illuatungiliuttut Ukiukkut ataatsimiinnermi immikkoortumi siullermi Naalakkersuisunut tatiginninnginnerminnik nalunaaruteqarput, tatiginninnginnermilu amerlanerussuteqartoqarnera pissutigalugu qinersisoqassaaq.
Ukiukkut ataatsimiinnermi ullumikkut ulloq siulliuvoq, Naalakkersuisuni Siumullu iluani sapaatini akunnerni marlunni isumaqatigiinngittoqangaatsiareersorlu illuatungiliuttut partiivi, Inuit Ataqatigiit, Demokraatit, Partii Naleraq Atassullu ataatsimoorlutik nalunaaruteqarput: Taakku tusagassiuutinut naatsumik nalunaaruteqarnerminni partiit sisamaallutik Inatsisartunut qinersisoqarnissaanik suaaruteqartoqarnissaa kaammattuutigalugu paasissutissiissutigaat.
Inatsisartunut kingullermik 2018-imi upernaakkut qinersisoqarpoq.
