Maannakkut: Illuatungiliuttut qinersisoqarnissaanik piumasaqartut - Kim Kielsenilu tamanut qujassuteqartoq
Illuatungiliuttut Inatsisartunut immikkut ittumik qinersisoqarnissaanik siunnersuutaat oqallisigineqareerpoq.
Partiit oqaloqatigiinnissaat pissutigalugu ataatsimiinnerup unikkallartinneqarnissaa, Inatsisartunut siulittaasup, Vivian Motzfeldtip (S) maanna piumasaringajalissavaa.
Suliap naatsumik oqaluttuarinera
Demokraatit naalakkersuisoqatigiinnit ataasinngormat tunuarmata Kim Kielsenip naalakkersuisoqatigiivi ikinnerussuteqalerput.
Naalakkersuisoqatigiit Siumut Nunatta Qitornaalu Inatsisartuni ilaasortaaffinni 31-usuni aqqanilinnik ilaasortaatitaqarput.
Siumup siulittaasortaava Erik Jensen Kim Kielsen taarserlugu Naalakkersuisunut siulittaasunngorusuppoq.
Partiilli illuatungiliuttut Siumup siulittaasortaavata naalakkersuisoqatigiivinut ilaarusunngillat.
Inatsisartuni amerlanerussuteqartut qinersititsinissamik maannakkut kissaateqarput.
Naalakkersuisut siulittaasuat nammineerluni tunuanngippat, qinersinissap sulissutigineqarnissaa partiit namminneerlutik aallartissinnaavaat.
Partii Naalakkersuisunut Naalakkersuisulluunniit siulittaasuannut tatiginnikkunnaarnermik ukiukkut ataatsimiinnermi taasititsippat qinersinissamut alloriartoqarsinnaavoq.
Naalakkersuisut siulittaasuat tunuarpat, Inatsisartut siulittaasumik nutaamik qinersissapput.
Siulittaasoq nutaaq naalakkersuisoqatigiinnit Inatsisartuni amerlanerussuteqartunit tapersersorneqartunik pilersitsissaaq.
Ukiukkut ataatsimiinneq marlunngorpat marsip ulluisa aappaanni aallartissaaq.
Tusarfiit: KNR taavalut Inatsisartut Allattoqarfiat.
Inatsisartut immikkut ittumik qinersisoqassanersoq oqallisiginninnerata kingornatigut taama pisoqarpoq.
Ukiukkut ataatsimiinnermi ullumikkut ulloq siulliuvoq, Naalakkersuisuni Siumullu iluani sapaatini akunnerni marlunni isumaqatigiinngittoqangaatsiareersorlu illuatungiliuttut partiivi, Inuit Ataqatigiit, Demokraatit, Partii Naleraq Atassullu ataatsimoorlutik nalunaaruteqarput: Taakku tusagassiuutinut naatsumik nalunaaruteqarnerminni partiit sisamaallutik Inatsisartunut qinersisoqarnissaanik suaaruteqartoqarnissaa kaammattuutigalugu paasissutissiissutigaat.
Inatsisartunut kingullermik 2018-imi upernaakkut qinersisoqarpoq.
AAMMA ATUARUK Ilimasaarut: Apriilip ulluisa arfernanni qinersinerit marluussapput
Unikkallartoqannginnerani Naalakkersuisut siulittaasuat, Kim Kielsen oqaaseqarpoq:
- Tamassinnut qujaniarpunga, Kielsen oqarpoq.
- Nutaamik qinersisoqarnissaa amerlanerussuteqartut kissaatigaat - taamammat suleqatigiinnitsinnut qujaniarpunga. Qanorluunniit pisoqaraluarpat aliasussanngilagut - naamik amerlanerussuteqartut isumaat ataqqissavarput.
Demokraatit naalakkersuisoqatigiinnit sapaatip akunnerata siuliani tunuarput – taamaammat Siumut Nunatta Qitornaalu kiserngorullutik ikinnerussuteqarlutik naalakkersuisoqatigiilerput. Taakku Inatsisartunut qinigaaffinnit 31-nit aqqaniliinnarnik qinigaatitaqarput.
Taamaalilluni illuatungiliuttut ersarilluinnartumik amerlanerussuteqalerput. Taakku inissanit 31-nit 19-inik inissisimaffeqarput.
Unikkallarneq naammassippat partiit tamarmik inersuarmi katersuuteqqissapput.
Naalakkersuisoqatigiillu tatiginnikkunnaarnermik pinngitsoortitsinissamut tassani periarfissaqarput, partiillu tassani taasissallutik. Maannakutulli isikkoqartillugu tatiginnikkunnaarnermik pinngitsoortitsinissamut amerlanerussuteqartoqarsinnaanngilaq.
Naalakkersuisunut siulittaasoq, Kim Kielsen oqaaseqartarfimmukarluni nammineq Naalakkersuisullu tunuarnerannik aamma nalunaaruteqarsinnaavoq. Taamaalillunilu qinersisoqassalluni.
